Nadine Visser ta mehorá e rèkòrt hulandes riba 100 meter ku opstákulo

56
Nadine Visser koriendo e 100 meter ku opstákulo.
DOHA – E atleta hulandes Nadine Visser durante di e kareda semi final di 100 meter ku opstákulo a logra mehorá e tempu hulandes di 12.71 sekònde pa 12.62 sekònde durante e kampionato mundial di atletismo ku a tuma lugá na Doha, Qatar i ku ayera a finalisá.

E atleta di 24 aña a finalisá di tres den e kareda semi final i a logra klasifiká pa e gran final a base di su tempu registrá. Den e gran final ku a tuma lugá ayera djadumingu, Nadine Visser a registrá un tempu di 12.66 sekònde, finalisando na di 6 lugá.

Tabata e atleta merikano Nia Ail ku a optené e promé lugá registrando un tempu di 12.34 sekònde (PB), seguidamente tabata su kompatriota Kendra Harrison ku a finalisá na di dos lugá registrando un tempu di 12.46 sekònde miéntras ku na di tres lugá a finalisá e atleta hamaikino Danielle Williams ku a registrá un tempu di 12.47 sekònde.