San Lucas ta logra nan di 12 titulo den Curfutsal

130
San Lucas pa di 12 biaha kampion den Curfutsal.
WILLEMSTAD—E kampionato 2019 di Curfutsal a konosé su weganan final ayera na SDK.

Securitas kampion divishon B

Esaki unda primeramente Securitas ku triunfo pèrtá di 4-3 ta gana di Sta Helena pa resultá e kampion den divishon B i asina ta promové pa hunga próksimo temporada den divishon A. Miéntras ku Sta Helena ku a keda komo supkampion djarason i djabièrnè awó pa 8’or di anochi, lo topa RO-Family den e seri di promoshon/degradashon riba kancha Errol Rooi den stadion na Suffisant.

Roderick Fraai (2x), Jourichmar Martina i Phonir Da Costa Gomez, tabata esnan ku a anotá pa e ekipo kampion ayera, miéntras ku pa e ekipo supkampion, Jose Zaval, Eliason Leal i Robertico Maria tabata esnan ku a anotá.

San Lucas kampion pa 12x

Seguidamente a tuma lugá e wega final den divishon A, unda ku San Lucas a logra e triunfo i titulo derotando Panteras Negras den un wega ku tabata un fiesta di gol, ku a finalisá 13-7, despues ku na sosiegu San Lucas tabata den bentaha di 7-2. Esaki despues ku ya for di e promé minütnan San Lucas a kue un bentaha kómodo di 5-0. Banda di tabata un wega di 20 gol, tabatin tambe diferente tirunan ku a suta na poste pa ámbos ekipo, den partido ku a hunga dilanti di un bon públiko.

Shurwendell ‘Pito’ Roosje (4), Ashar Bernardus (3), Maikel Pinedo i Oscar Vegas (2), miéntras ku Ivanny Calvenhoven i Jean Pauletta a anotá unu kada unu pa totalisá e 13 golnan di e ekipo di Bras ku ta dirigí pa Yubi Martis, ku ayera a logra nan di 12 titulo den Curfutsal.

Miéntras ku pa e ekipo di Panteras Negras, dirigí pa Edler de Castro, ku ta den nan di 2 temporada den divishon A i ya a hunga final, Michael Albertus a anotá na 3 okashon i tantu Rignon Weijman, komo Marcelo Celestin a anotá 2 gol kada unu.

Premiashon

Despues di e partido a sigui ku premiashon, ku entrega di trofeo na e ekiponan kampion i supkampion respektivamente, miéntras ku Jean Pauletta di San Lucas a risibí trofeo tambe komo máksimo goliadó di temporada, unda e la anotá na 24 okashon den divishon A. Bras di San Lucas a risibí tambe 500 florin i un bala, komo e kampion di kampionato 2019.