Ozhaino Albies ku ‘homerun’ di 2 kareda…. Yadier Molina ta yuda St. Louis Cardinals ekstende e seri

44
Ozhaino Albies aki ta konektá ‘homerun’ di 2 kareda.
MISSOURI – Apesar di un tremendo aktuashon di e pelotero yu di Kòrsou, Ozhaino Albies, ku a konektá ‘homerun’ di 2 kareda den kabes di 5 inen pa hasi e skor 4-1 na fabor di su ekipo Atlanta, e ekipo di St. Louis Cardinals, ku tabata atras den e skor (4-3) i tambe den e seri (1-2), ta reakshoná den bòm di 8 inen pa empatá e enkuentro 4-4 i den bòm di 10 ta laga e ekipo di Atlanta den tereno.

E hòmber grandi den  enkuentro di ayera tabata Yadier Molina ku a empuhá e kareda di empate den bòm di 8 i tambe esun di Viktoria den bòm di 10. Pero no mester kita mérito di Paul Goldschmidt ku a bai di 4-3 ku 1 HR i Marcell Ozuna ku a bai di 5-2 ku 2 HR.

Esaki mes ora ta nifiká ku e seri ta empatá 2-2 i tur kos lo keda disidí den un di 5 i último enkuentro ku lo tuma lugá mañan djárason na Atlanta pa 5’or atardi. Pa e ekipo di Atlanta lo ta e picher Mike Foltynewicz (8-6) ku lo ta riba montikulo miéntras ku pa St. Louis Cardinals lo ta e picher Jack Flaherty (11-8) ku lo ta riba montikulo.