Pa un temporada i 31 mion dòler…. Kyle Lowry ta akordá ekstenshon di akuerdo ku Raptors

33
Kyle Lowry ta akordá ekstenshon di akuerdo ku Toronto Raptors.
TORONTO – Kyle Lowry i e ekipo di NBA, Toronto Raptors, ayera a yega na un akuerdo pa ekstenshon di kontrakt pa un temporada i un montante di 31 mion dòler i di e forma aki e ekipo di Raptors ta sigurá e estadia di e base estelar, den e aktual ekipo kampion, te ku final di e temporada 2020-21.

E agente di Lowry, Mark Bartelstein, tabata esun ku a konfirmá e akuerdo ayera. Lowry i Raptors tabatin algun tempu kaba ta negoshá e ekstenshon di akuerdo i tabata di spera ku un ora pa otro esaki lo a konkretisá.

E base estelar di 33 aña ta na porta di inisiá ku e último temporada di un akuerdo di tres temporada balora na 100 mion dòler. “Mi ta sintimi muchu mas motivá ku nunka”, asina Lowry a deklará luna pasá. Durante e último sinku temporadanan Lowry a ser nombra ‘All-Star’.

“Una bes ku bo logra optené e título máksimo, semper bo ta anhelá pa konkista mas”. Esaki ta Lowry su temporada 14 den NBA i su di 8 ku Raptors i ta e hungadó aktual ku tin mas tantu tempu ku e ekipo.