Miéntras ku Merka ta alarga su titulo komo kampion di ekipo…. Simone Biles ta establesé rèkòrt di medaya den Mundial di Gimnasia

47
Simone Biles ta establesé rèkòrt di medaya optene den Mundial di Gimnasia.
STUTTGART – Simone Biles ayera a establesé un rèkòrt nobo despues di a konkista su medaya number 21 den un kampionato mundial di gimnasia unda ku e ekipo di Merka a alargá nan titulo komo kampion den e evento kombiná pa ekipo.

E medaya optené ayera pa Biles tabata su di 15 medaya di oro i a kibra un empate ku e gimnasta di Rusia Svetlana Khorkina pa e mayor kantidat di medaya optené pa un gimnasta femenino durante un mundial.

Biles a keda kòrtiku pa apénas dos medaya for di e sifra rèkòrt di 23, ku ta riba nòmber di Vitaly Scherbo, pa loke ta e máksimo kantidat ganá pa un gimnasta (hòmber i muhé). “Kada aña e sentimentu ta mihó mirando ku nos ta mehorando konstantemente”, Biles a komentá.

“Mi ta trata pa no pensa mes riba rèkòrt. Mi ta enfoká na hasi e loke ku mi a proponé mi mes pa hasi, kual ta kompetí pa mi pais.”