Toro Rosso ta brinda Yamamoto un oportunidat na Suzuka

40
Toro Rosso ta brinda Naoki Yamamoto un oportunidat na Suzuka.
SUZUKA – E piloto hapones, Naoki Yamamoto, durante e fin di siman benidero lo haña e oportunidat di su bida pa demostrá su abilidat durante di e Gran Premio di Fórmula 1 ku ta kore na su pais natal .

Yamamoto lo risibí e oportunidat djabièrnè awor, durante di e promé dia di entrenamentu liber ku ta tuma lugá riba e sirkuito di Suzuka, pa kore un di e dos vehíkulonan di Toro Rosso. E piloto hapones di 31 aña di edat lo remplasá e franses Pierre Gasly, kende durante e restu di e fin di siman si lo ta bèk den e vehíkulo di Toro Rosso.

“For di tempu ku mi tabata un mucha, mi soño tabata pa kore den Fórmula 1″, asina Yamamoto, ku e temporada tras di lomba a gana den dos kategoria di kompetensia diferente (Super Fórmula i Super GT). “Ta algu hopi speshal pa risibí e oportunidat na Suzuka, unda un kantidat di fanátiko Hapones lo ta sinta den e tribunanan.”

Yamamoto ya pa algun aña ta kore pa e ekiponan di Honda. E fabrikante hapones di outo ta esun enkargá pa traha e motornan di e vehíkulonan di Fórmula 1 di tantu Toro Rosso i Red Bull, e último aki di e ekipo Max Verstappen. Djadumingu awor lo tuma lugá e Gran Premio di Hapon.