Tratando na kibra e rèkòrt di 2 ora di máratòn…. Eliud Kipchoge lo haña yudansa di un total di 41 koredo

299
Eliud Kipchoge lo trata na kibra e rèkòrt di 2ora di máratòn.
VIENA – E atleta Eliud Kipchoge lo haña yudansa di basta koredó ku lo kompañ’é durante su hazaña pa bira e promé persona ku ta kore e distansia di máratòn bou di 2 ora. Un total di no ménos ku 41 atleta tòp lo djòin e atleta keniano den su intento pa logra e hazaña aki ku probablemente lo tuma lugá djasabra awor na Viena.

Entre e 41 atletanan aki tin un total di 55 medaya akumulá, unda un kantidat di esakinan a keda ganá den weganan olímpiko i tambe kampionato mundial di atletismo segun e organisadó britániko Ineos a informá.

Entre nan tin e tres rumannan di Norwega Henrik, Filip i Jakob Ingebrigtsen ku tambe lo forma parti di e tim. E ruman mas hóben, Jakob, di 19 aña, durante e kampionato oropeo di atletismo di e temporada tras di lomba, di forma sorpresivo, a konkista e medaya di oro riba e distansia di 1500 meter i tambe 5000 meter.

Meskos Selemon Barega, ku a optené medaya di plata riba 5000 meter na Doha, i tambe Matt Centrowitz, ganadó di medaya di oro riba 1500 meter durante weganan olímpiko di Rio, tambe ta forma parti di e lista di esnan ku lo kompaña Kipchoge.

Ainda e aktividat aki ta koriendo poko rísiko, esaki debí na e wer. E sitio unda esaki lo tuma lugá ya ta konosí i Kipchoge lo uza un ruta ku ta pasa den e Hauptallee den e Praterpark na Viena.