E tema di finansa públiko ta kompliká i hasta tin biaha e por kansa hende

186
Parlamentario Wimbert Hato ta bisa ku den e tempu di krísis i défisit asina grandi, ta importante pa nos bira konsiente ku mester hasi mas ku ménos òf a lo ménos no malgastá loke ta di nos.

 

Willemstad, — Parlamentario Wimbert Hato ta bisa durante reunion públiko ku e tema di finansa públiko ta kompliká i hasta tin biaha e por kansa hende, pero ta e materia esensial pa pone un pais funshoná.

Señor Hato ta bisa ku e proseso pa aprobá e parti aki mester ta parti di nos tur, pues di tur ámtenar. E ta splika ku for di ora bo ta traha pa gobièrnu bo tin deber di kumpli pa salbaguardiá finansa públiko.

Esaki no ta tarea di minister di finansa so, e mester ta tarea di tur ku ta traha pa gobièrnu.

Minister di finansa ta presentá e sifranan, pero ta kada sirbidó di pueblo tin deber di kuida fondo públiko.

Hato ta sigui bisa ku den e tempu di krísis i défisit asina grandi, ta importante pa nos bira konsiente ku mester hasi mas ku ménos òf a lo ménos no malgastá loke ta di nos. E parlamentario pa partido MAN ta bisa ku fondo públiko tambe ta patrimonio nashonal.

“Nos kada un tin deber di kumpli ku nos debernan. Mal kustumber a pone nos den e situashon ku pais ta aden, Nos tur mester kumpli pa saka nos pais pa dilanti for di e buraku ku nos ta aden” asina señor Wimbert Hato ta splika den su diskurso den parlamento

E ta bisa ku un di e puntonan importante di CFT ta, ku mester kompensá défisit di 112 mion den 2019 mes, den reakshon di CFT 10 sèptèmber e aña aki, nan ta bisa ku segun e relato final, lo tin un ‘sluitende begroting’, esaki ta nifiká ku gobièrnu, (nos pais) por kumpli ku presupuesto balansa.

Mas aleu Hato ta sigui bisa ku e kos ta bai ku non ta kumpli ku nos mes i no ku CFT, tambe e ta bisa ku e ta señalá ku tin preokupashon pa kua e kandela ku tabatin na ontvanger i e miedo ta ku e  trese tardansa riba e kobramentu di impuesto i Hato ta bisa ku e kier sa si di bèrdat esaki lo tin  influensha.

E ta bisa tambe ku e ta kontentu ku ta bai kumpli ku sindikatonan den enseñansa, esta ku a pone 10 mion pa kumpli ku e maestronan.