Kòrsou ta logra 1 punto importante na Costa Rica

584
E ekipo ku a inisiá kontra Costa Rica.
WILLEMSTAD—Nos selekshon nashonal di futbòl a logra pa optené un punto importantísimo na Costa Rica ayera. Esaki hungando kontra di e ekipo di kas, den wega bálido pa grupo D di Liga A di Concacaf Nations League.

Un ke otro unda hungando den stadion Alejandro Morera Soto, nos ekipo nashonal a optené 1 punto, empatando sin anotashon.

Tabata wega ku nos ekipo a duna un bon futbòl, unda nos tabata pará bon riba tereno i nos futbolistanan respaldando otro den hugadanan, unda e parti defensivo a resaltá komo unu.

Pa loke ta e parti ofensivo tambe Kòrsou tabatin algun bon hugada di kombinashon i a logra pa bira peligroso na algun okashon, kreando e oportunidatnan pa por a anotá.

Rangelo Janga, tabatin algun di esakinan, unda ku sigur tabatin un franko, ku sigur lo mester a bira e gol, ku lo por a duna nos e triunfo. Gorre tambe tabatin avansenan ku a bira peliger, miéntras ku e la desperdisiá un chèns pa bira peligroso riba un fayo di un defensa. Finalmente Gino van Kessel tambe a krea algun peliger riba ala drechi, riba hugadanan den direkshon di e arko defendé pa e gran portero Keylor Navas, ku a sa meskos ku Eloy Room, pa mantené su gol limpi, unda e ekiponan a empatá 0-0.

Gevaro Nepomuceno, Juninho Bacuna i Kenji Gorre tabata e 3 hungadónan ku a risibí karchi hel durante di e partido.

Tékniko Remko Bicentini ayera a inisiá ku Eloy Room den gol. Den defensa Jurien Gaari, Shermar Martina, Leandro Bacuna i Gevaro Nepomuceno.

Den mediokampo, komo esnan mas defensivo tabatin e duo formá pa Jeremy de Nooijer i Juninho Bacuna, ku na banda Elson ‘Sontje’ Hooi i Kenji Gorre (Gino van Kessel. Miéntras ku nan dilanti a hunga Brandley Kuwas (Roly Bonevacia 55’) i Rangelo Janga tabata esun mas den ofensiva.

Miéntras tantu otro luna, dia 14 novèmber 2019, Kòrsou lo mira akshon na kas den Stadion Ergilio Hato, enfrentando Costa Rica, komo nos próksimo i último enkuentro di e grupo aki, unda ku tambe Costa Rica i Haiti, lo mester enfrentá otro ainda.

Ku e resultado aki, Kòrsou ta sigui na kabes di grupo, awor ku 5 punto for di 3 wega, sigui pa Costa Rica ku tin 2 punto for di 2 wega i Haiti ku tambe 2 punto, pero for di 3 wega.