Víktima envolví den aksidente grave riba Pater Eeuwensweg ta bin fayesé

Ta trata di aksidente riba dia 14 di sèptèmber entre outo i pikòp

2100
Willemstad— Ekseso di velosidat i falta di kontròl riba e vehíkulo a pone ku un hóben di 26 aña a bin pèrdè su bida despues di a keda kasi 1 luna interná den kuida intensivo.
Un bista na e daño material ku a keda tras na e vehíkulo ku e víktima tabata aden.

Tabata dia 14 di sèptèmber den oranan di anochi ku a pidi asistensia di polis i tambe ambulans riba Pater Eeuwensweg nèt na altura di e edifisio di El Tributo pa un aksidente basta grave entre di dos vehíkulo i tambe ku basta daño material. Einan polis a bin topa e dos vehíkulonan envolví den e aksidente ku tabata trata di un outo di famia ku dos okupante aden i  un pikòp ku un okupante aden. E outo tabatin basta daño material miéntras e dos okupantenan di e outo tabata den un situashon basta grave. E shofùr di e pikòp tambe tabata leshoná i mesora a hasi e trámitenan pa tur tres víktima wòrdu transportá pa Poli. For di un investigashon preliminar e dia ei a bin saka afó ku e outo ku e dos okupantenan den dje tabata move riba Pater Eeuwensweg den direkshon di Otrobanda ku un velosidat basta haltu. Tabata despues di a pasa e lusnan di tráfiko ku tin na e entrada pa drenta  unda tabata Hotèl Holliday den direkshon di Otrobanda e shofùr ku tabata manehá e outo a bin pèrdè kontròl riba e vehíkulo.

E pikòp ku e outo a bai dal kontra di dje.

Esaki a pone ku e outo a kore den skual pasa riba e berm entre di e dos kaminda nan bai dal kontra di un pikòp ku tabata aserkando for di e direkshon kontrali. Tabata un choke formal ku basta daño material. E trio leshoná a keda transportá pa Poli miéntras un di e okupantenan di e outo debí na e múltiple leshonnan ku e la bin sufri a keda interná den kuido intensivo.  Tabata djasabra den oranan di mainta ku a drenta e tristu notisia ku e víktima ku tabata interná den kuido intensivo a bin fayesé. Ta trata di e hòmber Prince Simon Stephens, nase na Kòrsou dia 2 di yanüari 1993. Di parti di Vigilante ta bai palabranan di kondolensia na famia di e víktima ku pèrdida di nan ser kerí.