Eks polis detené pa investigashon ladronisia 600 kilo di koka

Nèt despues di 1 aña

2724
WILLEMSTAD— Mester a warda nèt 1 aña pa outoridatnan realisá e promé detenshon den e kaso di ladronisia di 600 kilo for di warda di reshèrshi na Garipitoeweg.

Ayera den oranan di mainta trempan efektivonan di Landsrecherche huntu ku RST a bai Seru di Kandela pa ta mas eksakto Kaya Sekou pa asina por a hasi un investigashon. Einan ta trata di kas di e eks agente Polisial Mariano kual te na último promé ku su retiro tabata traha na warda di Polis na Otrobanda.

Ayera e eks polis Mariano a keda detené i mesora hiba pa ofisina di Lands reshèrshe.

E tim investigativo ku a bai na e kas mesora a logra di detené e eks agente polisial Mariano i a bai warda kuné  pa mas investigashon. Mesora despues di a presentá ku e eks polis na e ofisina di Landsrecherche un ratu despues su abogado tambe a presentá pa asina por a sostené su kliente durante di e promé parti di interogashon.

Miéntras ku tabata interogando e eks polis a kuminsá ku un otro investigashon den e bario di Goede Hoop pa ta mas eksakto Salsbachweg. Einan tabata e tim di aresto huntu ku demas efektivo a drenta den un kasita pa asina por a detené un hòmber.

Otro sospechoso ku a keda detené ayera mainta.

Tabata trata di un latino ku a keda arestá pa seguidamente bai kuné tambe na e ofisina di landsrecherche unda e eks polis tambe tabata detené. No ta konosí ki laso e dosnan aki por tin ku otro pero tur dos a keda interogá den e ofisina di landsrecherche pa despues ku nan a haña di tende serka e Fiskal Ousiliar ku nan tin di keda será enkonekshon ku e investigashon ku tin andando a bai hiba nan sera den un sèl pa awe por kontinuá ku e investigashon.

E agente Polisial Mariano a ser hibá Prizòn na unda e la keda enkarselá den Blòk 1. E agente polisial Mariano sigur for di despues di mas òf ménos 1 siman ku e ladronisia di droga a tuma lugá for di e warda di reshèrshi su nòmber a ser mentá komo un di e promé nan. Tabata ser bisá ku ta un baron di droga mester a aserk’é ku un oferta formal pa buska pa sa unda su droga ta wardá pa e por haña esaki bèk kual e oferta lukrativo aki  e no por a ninga. Tabata  trata di un lote formal di droga ku a ser konfiská na e parti nort di Kòrsou ora ku dos hòmber yu di Kòrsou a trata di yega tera ku esaki di laman  via di e tereno di Maal pero a keda interseptá pa Warda Kosta.

Ta trata di droganan ku a keda konfiská riba un boto na e parti nort di Kòrsou.

A konfiská e lote aki i a bai ward’é den e warda di reshèrshi na Garipitoeweg den un kompartimentu ku no mester a hasi masha pa por a yega na dje. Asta a ser bisá ku e agente polisial aki por a yega fásilmente na e droga aki debí ku e tabata traha den e Hato team i tabata un di esnan ku tabata bai hiba droga konfiská na e warda di reshèrshi i tabata sa presis kon yega na e lote ku a ser konfiská i wardá den e reshèrshi. Esaki tabata un di e motibunan ku e la wòrdu aserká pa asina duna informashon kon por a yega na e droga. Tabata dia 14 di òktober di aña pasa ku a logra di drenta den warda di reshèrshi unda  hisa tur e bultonan di droga bai kuné.  E dia ei e ladronisia di droga a bai sumamente fásil debí ku  tabatin un yobida torensial i tabata bon na altura tambe ku no tin niun hende presente den e warda ounke ku tabatin un lote formal warda eiden.

Vèn ku a keda usa pa transportá e droga pa despues a kima esaki.

A hasi uso di un vèn ku a ser hòrta den e Bario di Mahuma i despues ku a baha e droga a bai kima esaki den aria di Libu. Sigur awor aki no por haña nada mas di e droga pero ku si tei trata di haña sa esnan ku a drenta warda di reshèrshi pa kue e droga i tambe ken a duna órden pa bai kue esaki. Ku detenshon di e agente polisial aki e kaso tei bira sumamente interesante.

Portada di 4 di yüli último unda tabata indiká ku e polis envolví a entregá su retiro

Vigilante ku a bin ta sigui e kaso aki hopi di aserka ya a relatá bastante di esaki i asta 4 di yüli último a relatá ku e agente polisial envolví den e kaso di ladronisia di droga mester a entregá su retiro. Vigilante ta dispone di informashon   ku miéntras  tabata hasiendo investigashon riba e eks polis aki i a bin haña sa ku e ta planiando un otro delito huntu ku e latino ku tabata kedando den Salsbachweg pa kual e tabatin basta kontakto kuné. Mesora despues di a detené e eks polis a bai Salsbachweg kaminda tambe a detené e latino pa mas investigashon.