Mal trabou di un señora a pone ku Prizòn no tin banchi pa prezunan bai kas

665
Tipo di banchi nan asina ta ser usa pa kontrolá un prezu ku bai kas.

Willemstad,– Aparentemente na e momentunan aki tin prezunan den prizòn SDKK ku lo por ta na kas ku banchi, pero pa motibu di e echo ku no tin banchi disponibel, nan mester keda sera i no sa te ki dia.

Informashonnan ku a yega Vigilante ta mustra ku ántes tabatin un departamentu ku ta konta ku hendenan kapas i ku sa kon pa atendé ku e banchi nan, pero ku for di despues ku un señora a drenta e instituto i disidí ku e mes ta atendé ku e banchi nan, kosnan a brua formalmente.

Segun informashon e banchi nan aki kada sierto tempu mester ser saka i pa ekilibrá esakinan, pero e señora no tabata sa mes di e ‘handeling’ aki i e no a hasi loke mester a hasi, poniendo ku tur e banchi nan a  desekilibrá i konsekuentemente mester a manda tur esakinan bèk fábrika pa ekilibrá esakinan.

Esaki naturalmente ta situashon di preokupashon sigur pa e prezunan ku ta bini na remarke pa bai kas ku banchi, kual ta un derecho di kada prezu. Segun nos fuente ta trata aki di e mesun persona ku tabata metí den e asuntu di trahamentu di tasnan den prizòn.