Trahadonan di Refineria Isla ta sigui den akshon wardando solushon di protokol

Sindikatonan APRI I PWFC a perde konfiansa den SR. Delannoy

134
 Sr. Angelo Meyer di PWFC huntu ku Sr. Gherrel Remilia di APRI.
Willemstad- Djamars anochi 15 òktober 2019 a drenta e notisia ferfelu serka trahadónan di Refineria Isla ku RDK a pone beslag riba tur inventario di refineria isla. Esaki despues ku Refineria Isla a saka un komunikado indikando diferente punto di prekupashon pa loke ta trata e beslag.

Trahadónan a agrupá na pòst 7 kaminda a yama nan sindikatonan Apri i Pwfc pa duna mas informashon riba loke tabata pasando. Rdk insistentemente a indiká ku e beslag ku a ser pone riba isla no ta riba tur inventario pero riba 11 mion florin ku Aqualectra lo mester paga refineria. Refineria a duna di konosé ku esei no ta kuadra i a splika ku nan interpretashon ta ku e beslag ta riba tur inventario te na un montante di $ 74 mion. Despues di basta intento sindikatonan a bin haña e dokumentonan te den oranan di mardugá. Despues di esei a bai sede i a analisá e kontenido di e beslag i niun kaminda por a nota den e dokumentonan e montante di 11 mion florin ku RDK a pone riba kuenta di Aqualectra ku mester bai isla.  Su manisé mainta Sindikatonan a pidi asistensia di un abogado ku a pasa den e dokumentonan i a splika nan miembro i trahadónan di isla kiko presisamente e beslag ta enserá.  Despues sindikatonan a reuní ku Minister Quincy Girigorie i Minister Giselle Mc William kaminda na nòmber si tur trahadó di Refineria Isla sindikatonan a hasi e petishon pa lanta e beslag di e 11 mion ku RDK ta papia di dje i tambe pa yega na protokòl ku ta enserá ku RDK lo no ehekutá niun beslag mas sino sinta na mesa ku tur stakeholders pa yega na solushon na mesa.

Trahadónan a bisa ku si sindikatonan no bin ku e protokòl nan lo no reanudá boka di trabou. Entretantu e dos ministernan a keda den kontakto ku sindikatonan regularmente pa duna informashon pero sinembargo nochi a sera i no a yega na solushon di tur e diferente problema riba e dia di ayera i sindikatonan den transkurso di 7:20 a pidi pa tur trahadó bai kas i regresá awe mainta kaminda lo bai keda en espera di e protokòl. Trahadónan ta sumamente indigná i a bisa ku no ta bai permití RDK stroba entrada di Refineria Isla ku ta hasi posibel e pago di entre otro salario di e lunanan benidero i otro benefisio ku ta pendiente. Mas aleu sindikatonan tambe a haña e suseso aki hopi di lamentá pa e motibu ku na vários okashon RDK/ PMO a pidi sindikatonan mantené trankilidat pa asina e proseso pa yega na un partner pa ópera Refineria kana bon i sin disturbio.

Sindikatonan tambe a indiká direktor di RDK pa wak bon su pasonan kontra di Refineria Isla paso esaki por afektá trabou di sindikatonan negativamente, manera entre otro yega na kombenio riba afvloeingsplan ku Isla/ PDVSA.  Tambe nos por mira ku e prefer bidder ku PMO a anunsiá a kuminsá bishita Kòrsou i tin 3 dia ku nan a bishita Refineria. Sorpresivamente RDK ta hasi algu asin’aki. Rarara ku kua intenshon nos mes lo ke kòrta den nos mes kueru?  Sindikatonan a indiká di a pèrdè konfiansa den e direktor di RDK Sr. Delannoy pa motibu na diferente okashon a palabra ku ta wak kon i kiko ta hasi pa no trese disturbio, pero kontra tur palabrashon Sr. Delannoy a disidí ku e ta pone beslag riba entradanan di Refineria Isla,tresiendo mas angustia ku ya tin serka trahadónan di Refineria Isla.

Den pasado a tilda Sindikatonan di ta e kulpabel ku e kompania ku tabata e prefer bidder a lanta fo’i mesa bai. Esaki ta e timing perfekto pa tuma tal desishon nèt na e momentu ku tin un kompania ku ta hasiendo due deligence ? Sindikatonan ta spera ku e trabou ku e dos minister a kuminsá lo por prosperá i ku partidonan por haña otro i asina por tin un protokòl ku e petishon di trahadónan aden.