Prizòn no ta haña niun produkto di kushina for di Best Buy

344
Segun direktor di SDKK señor Floran ta nan mes a yama GMN pa bin inspekshoná i yuda ku konseho, paso e venenu ku ta ser usa no ta hasi nada mas ku e kakalakanan.
Willemstad,– Urny Floran direktor di SDKK ta bisa ku siman pasa djaweps a haña bishita di GMN despues ku  nan mes a hasi petishon pa GMN bin yuda ku inspekshon di e kushina di e instituto. Floran ta bisa ku ta spùit, pero a bin tuma nota ku e spùitmentu no tin efekto mas i p’esei a pidi GMN pa bini i yuda ku konseho.

Señor Floran ta bisa ku djaweps GMN a kana huntu ku e kompania ku ta spùit i despues di esei nan a wak tambe e produktonan ku ta ser usa. E intenshon tabata ku nan lo a bini siguiente dia 6’or di mainta pa wak dikon e produkto no tin efekto i esei a pone ku mester a sera e kushina inmediatamente pa bini ku otro plan. E ora ei mester a buska otro instansia pa yuda i esei a pone ku prezunan a haña kuminda te lat.

E direktor ta sigui splika ku GMN a bisa pa hasi e kushina bashí di manera ku por usa preshon di awa pa laba i kita tur venenu i pa usa otro insektisida pa wak si esaki si por yuda despues di tres dia.

Entretantu SDKK a sera kontrakt di un siman ku e instansia ku ta kushinadó di manera ku ta haña tempu pa limpi i kita tur kos den e kushina pa evitá ku si e insektisida no ta traha, lo bolbe konfrontá problema.

Floran ta bisa ku no ta bèrdat ku despues di a bai Best Buy a bin prizon, e ta bisa ku nan no ta haña niun produkto di kushina for di Best Buy. E ta bisa ku tampoko ta bèrdat ku ta for di basta tempu tin e problema aki. E ta bisa ku e kompania ku tin aworakí, tin 1 aña i mei ta spùit i ku e kakalakanan a bira familiar ku e produkto i ku mester usa otro produkto i inspekshon di GMN a duna otro produkto ku por usa pa kaba ku e kakalakanan. E ta bisa ku no ta bèrdat ku e kos aki tin hopi tempu andando.