Tur kos ta kla pa di 6 edishon di ‘KLM Maratòn’

151
Momentu ku a kaba di hasi entrega di e medaya hubileo na Minister Presidente.
WILLEMSTAD—Di 6 edishon di KLM Curaçao Marathon ta djis ei, esta dia 24 di novèmber benidero. Relashoná ku esaki, presidente di e fundashon Run in the Sun, Kees van Muiswinkel, kende ta enkargá ku organisashon di e evento, a hasi entrega di un medaya di hubileo na Promé Minister Rhuggenaath.

E medaya ta komo gradisimentu pa e sosten risibí i esaki den nòmber di e partisipante-, spònser-, partner- i voluntarionan di KLM Curaçao Marathon.

E medaya di hubileo aki ta algu spesial: Koló di Oro ku fecha. Un banda ta e bandera di Kòrsou i e otro banda ta e spònsernan prinsipal. Kada partisipante lo risibí un dje medayanan aki dia 24 di novèmber na ‘finish’.
“Komo organisashon nos meta ta pa e evento aki haña rekonosimentu nashonal i internashonal. Pa e di 6 edishon ta spera partisipashon di 2.500 persona for di 34 pais”, según Muiswinkel a duna di konosé. Dos tersera parti ta di Kòrsou i un tersera lo bini nos isla spesialmente pa e evento.

Curaçao Marriott ta e sitio kaminda ta kuminsá i finalisá.
Ku 5 distansia, tin algu pa kada hende: Máratòn, mitar máratòn, 10 i 5 kilometer i tambe ‘walk& run’ i e Trail riba distansia di 9.9 kilometer. Pues pa kada hende tin un distansia apropiá, di manera ku tur hende por partisipá.
Ainda por inskribí i dirèkt tuma number pa start. Esaki por bai online via dje website  www.klmcuracaomarathon.com.
Partisipantenan ta risibí nan prueba di inskripshon ku registro di tempu online, un T-shirt grátis i kada partisipante ta risibí un medaya.
Kada partisipante di Kòrsou tin e oportunidat pa via nan number di start, bini na remarke tambe pa gana 2 KLM-retourtickets Kòrsou-Amsterdam.
Despues di entrega di premio lo tin un tómbola di KLM Kòrsou, kaminda partisipantenan for di Aruba, Boneiru i Kòrsou ta bini na remarke pa gana e dos pasashinan menshoná.