Tico Libiee por pasa forma parti di “Génesis” komo kantante prinsipal

347
E rumor nan ta fuerte den kaya ku e por pasa forma parti di e banda “Génesis”.

WILLEMSTAD,—-Di informashon ku a drenta na mesa di redakshon di ‘E Mulina’, ta bisa ku tin kombersashon i alabes negoshashon ta tumando lugá entre Direktiva i gerente di agrupashon musikal “Génesis” den ámbito di Kòmbèk i e kantante Tico Libiee.

Mas aleu ‘E Mulina’, a keda pone na altura ku e kombersashon nan ta asina fuerte ku Tico Libiee pe pasa forma parti ofisial di agrupashon musikal “Génesis” i asina bira kantante prinsipal di e agrupashon musikal ariba menshoná.

Si esaki bira realidat mester bisa ku e agrupashon musikal “Génesis” lo bai bira un banda ku sin duda mester tene hopi kuenta kuné den futuro den ámbito di Kòmbèk. No ta un sekreto ku Tico Libiee ta un kantante ku tin masha hopi fanátiko den nos farándula i esaki sigur lo bai yuda e banda ariba menshoná bon tambe.

‘E Mulina’, a drenta den kontakto ku Dudley Lucia ku ta forma parti di maneho di agrupashon musikal “Génesis”, kaminda ku nos a puntr’é kiko tin di bèrdat di e rumor nan ku tin den kaya ku bo organisashon ta den kombersashon ku e kantante Tico Libiee pa e pasa forma parti di “Génesis”. T’asina ku Dudley Lucia a bisa ‘E Mulina’, “Ami no ta altura ku tin kombersashon ta tumando lugá ku Tico Libiee, mi no sa si otro hende lo ta den kombersashon ku e kantante en kuestion, pero si mi por bisabu ku tin diferente kantante ku a bati na porta di “Génesis’, pero ku te ainda no tin ningun desishon tuma, si dado kaso yega asina leu mi mes lo ponebu na altura di e desaroyo nan”.

‘E Mulina’, sin duda lo bai sigui e desaroyo aki ku wowo nan di falki, paso na diferente okashon nos a trese e informashon nan aki, i semper tabatin ningamentu pero pa despues di algun siman, nos informashon a bin ta kuadra ku realidat. Pues djis sigui wak pa bo tin bo Korant Vigilante tur pero tur dia den bo man, pa asina bo no pèrd’é nada di e moveshon nan ku ta tumando lugá den nos farándula.