Jose Jardim a trata tur manera pa retirá Emsley Tromp

Komo minister

1377
Tromp ta bisa ku tur e kosnan ku a pasa rondó di su persona a hasi un daño inmenso na su persona internashonalmente i tambe komo profeshonal.
Willemstad,– Eks direktor di Banko Sentral di Kòrsou i Sint Maarten Dr. Emsley Tromp ta bisa ku den pasado minister Gibson di Sint Maarten a aserka su persona bisando ku Hulanda ta poniendo preshon debí na e echo ku  Jose Jardim komo minister di finansa a aserka BZK ku gobièrnu di Kòrsou kier ‘ontslag’ su persona, pero Sint Maarten no kier duna koperashon.

E èks direktor di CBCS ta splika ku nan a keda pone preshon riba Sint Maarten usando e asuntu di repartishon di bienes despues di 10-10, Pues Jardim tabata pone preshon i e kos a bai asina leu ku PG a bai serka señor Gibson i bisé ku e tin ku aktua, pues pa via di Sint Maarten kolaborá pa por ontslag su persona. Tromp ta bisa ku e kos a bai asina leu ku nan a bisa di lo sigui buska te ora ku haña algu kontra su pèrsona pa asina retir’é komo direktor, Tambe el a keda informá ku den e proseso ei tabatin e proseso di nombramentu di Ys dor di Sint Maarten i akinan tambe tabatin diskushon. E ta bisa ku ya for di 2009 el a bisa gobièrnu ku e no tin interes mas i ku el a sirbi sufisiente, pero dor di petishon  di gobièrnu el a keda i el a purba keriendo ku e ta sigui sirbi komunidat kontestando e yamada ku a hasi na dje, pero e final tabata largu i duru manera tur hende sa.

Tromp ta sigui bisa ku e kos aki a hasi un daño inmenso na su persona internashonalmente i tambe komo profeshonal.

E ta bisa ku tabata den esfera priva kaminda palabra di korte a papia palabra kla. “Aki bo ta mira ku e diferensha ku tin entre señor Traa i señor Jardim  no ta nada straño, loke mi no ta komprondé dikon ora tin desakuerdo e ta bira personal, paso normal ora tin desakuerdo por regla esaki ku diálogo”, asina Tromp ta bisa.

Segun Tromp aktualmente un di e kosnan mas ku ta eksistí den desakuerdo ta ku e akusashonnan ta asina fuerte den kuadro di palabranan ku ta ser hasi, kual ta algu ku e ta kere ta di interes ku no solamente mester keda limitá na Banko Sentral, paso presidente ta bisa ku tin sierto kosnan ku no ta korekto ku ta ser hasi dor di su kolaboradónan, pues mester por yega na mihó desishon.

Tromp ta sigui bisa ku e asuntu di akusashon di un pa otro no ta saludabel. E ta bisa ku e ta spera ku hunta di komisario lo atendé e kosnan di e manera korekto. E kosnan aki ta trese basta intrankilidat i desgusto pa e trahadónan.

Banko Sentral ta un organisashon di 250 persona i lei ta bisa ku ora bo tin un organisashon grandi asina, desishonnan  ta bai konhuntamente ku hunta di komisario.

Tromp ta bisa ku Banko Sentral ta sumamente importante i un punto ku semper el a enfatisá na su koleganan ta, ku nan mester ta konsiente di e importansia di e servisio ku e ta duna na e islanan. “Banko Sentral te pa stabilidat di nos florin i nos situashon finansiero”, asina Tromp ta bisa.