Pareha penshonando a haña resibu di kasi 12 mil florin

Aqualectra a dal un famia humilde di montaña duru:

426

WILLEMSTAD—Den fin di siman ku ta tras di lomba redakshon di Vigilante a keda konfrontá ku e echo ku tin diferente kliente di Aqualectra man na kabes relashoná ku sierto resibunan ku nan a bin ta risibí.

Nafls 11,964,84: Kasi 12 mil nan tabatin di paga promé ku 28 di òktober. Un pareha penshonado biba den e bario di Montaña. Tin hopi reklamo riba fakturashon di Aqualectra

Ta asina ku entre otro un famia penshonado ku ta biba den e bario di Montaña a keda notifiká pa Aqualectra ku nan tin un debe atrasá di kasi ku 12 mil florin. Pa ser eksakto ta trata di un resibu akumulativo di Nafls 11, 964, 84 sèn. Pa kolmo Aqualectra ta notifiká e famia penshonado aki ku nan tin te ku 28 di òktober pa paga esaki. Vigilante a bai hasi un investigashon pa lokual ta trata e famia aki ku ta biba den Montaña. Ta asina ku e pareha tin na e momentunan aki 45 aña kasa. Nan tin 65 i 66 aña respektivamente. Huntu ku nan den e kas ta biba nan yu ku 2 nietu. Pues na e kas ta biba 5 persona. Ya kaba e famia aki tin un areglo di pago di 275 florin pa luna. Huntu tur luna nan ta paga komo 800 florin tur luna na Aqualectra. E areglo di pago mes ta algu ku a bin ta forsa nan komo famia, pero nan tabata kumpli pa asina por tin suministro di koriente i awa. Lokual ku si a kue nan kompletamente for di base ta e echo ku diripiente nan ta risibí un notifikashon di Aqualectra ku nan tin un debe akumulá di kasi 12 mil florin. Esaki a  pone ku  ya nan a drenta den kontakto ku esnan ku ta traha na Aqualectra kende a partisipá na nan ku tin un os ku no ta klòp. E persona aki a keda di atendé e asuntu, paso e mes di Aqualectra ta sorprendí ku loke e la tuma nota di dje. Esei no ta e úniko famia ku a risibí un resibu di sorpresa di parti Aqualectra.    Serka otro famianan Vigilante a keda notifiká ku Aqualectra ta  kobrando su klientenan suma nan grandi di sén i bisa nan ku nan ta obligá di pag’é òf drenta areglo di pago. Den e kaso aki tambe ta trata di famianan penshonado ku ta lora man. Ofisialmente nan no tin trabou, pero nan ta penshonadonan ku ta lora man.  Ta asina ku sagradamente nan ta paga nan koriente i awa. E kasa a hasi ferfelu ku su señora, paso resibu a tarda e luna aki i pa nan sorpresa a haña unu di Nafls 2600,65. E kasa den su desesperashon pa nan no kòrta suministro di koriente a bai banko kue loke e tabatin di spar ku tabata Nafls 1500,– pa a hiba pa Aqualectra i drenta den un areglo pa paga e sobra poko poko.  Un otro señora ku no ta ni biba den su kas ainda pa falta bentana i porta ku mosaiko tambe wc  a  kobr’é Nafls 600,–.  Otro señora ku tin fundeshi so a kobr’é Nafls 400,–. Un otro señora a notifiká Vigilante ku e sa paga Nafls 145,– pa luna di awa ku koriente. El a keda sorprendé kon luna di òktober su awa so a bin Nafls 1590. Lokual ku mas a hala atenshon di Vigilante ta di un señora ku a duna di konosé ku for di yüli  e tin Pagatinu, pero, pero ku  nan ta kobr’é koriente ketu bai. Den su kaso el a bai pèrdè su tempu pa nan drech’é, pero segun e la indiká na Vigilante a resultá ku nan no a hasi nada, paso e la  bolbe haña resibu di koriente. Otro kaso ku a bin na konosementu di Vigilante ta regarda un señora ku a haña resibu di Nafls fl3500,–. Den su kaso el a relatá ku 1 luna koriente ta Nafls 250 i algu, pero ku despues e ta bin riba Nafls 900,–. E la mustra nos ku nan a oblig’é paga mitar sèn na man sino no ta habrié.  Un otro a indiká na Vigilante ku nan a haña un resibu di mas ku Nafls 400 di awa, pero ku nunka nan a yega di usa dje tantu ei. Un otro mas ku Vigilante tabatin kontakto kuné ta un señora ku a bisa ku e tambe a haña un resibu di Nafls 1600,– na awa. El a hura Vigilante ku nunka di su bida e la gasta e sèn ei na awa. Segun e la mustra Vigilante ku normal ta entre Nafls 80,00 i Nafls 100,00 e tabata paga na awa. Un otro kaso ku a hala atenshon tabata di un señora ku a indiká ku 2 biaha e la a risibí mesun resibu pa paga. E la reklamá kon bin e la a haña e mesun resibu, nan no a dun’é un kontesta satisfaktorio.