Rumor nan ta fuerte ku Jeftreck“Von Luca”Luciana a pasa pa TCFM i TeleCuraçao

218
E kara nobo di Kanal 8.
WILLEMSTAD,—-Di informashon ku ‘E Mulina’, ta disponé di dje ya pa algun siman ta ku tin algun moveshon serio ta tumando lugá na Seri Ararat pa ta eksakto na TeleCuraçao. Un di e moveshon nan ku nos a keda pone na altura di dje ta esun ku ta bai rondó di e hóben Jeftreck “Von Luca” Luciana.

T’asina ku “Von Luca” no ta un deskonosí den mundu di farándula, ta trata aki di e hóben ku ta laborá na Radio Mas 99.7 den e departamentu di Deporte i tambe den temporada di Festival di Tumba e ta forma parti di e tim di transmishon di e radio ariba menshoná.

‘E Mulina’, tin informashon ku “Von Luca” lo bai tin e parti di deporte kompletamente den su man na TeleCuraçao, pero no esei so, paso tambe ‘E Mulina’, tin informashon ku “Von Luca” lo bai tin su mes un programa di deporte na Radio TCFM.

Mas aleu nos a keda pone na altura ku “Von Luca” lo bai bin ku un programa di Deporte en general na Kanal 8, kaminda ku e lo bai entrevista diferente deportista. ‘E Mulina’, a keda pone na altura via di su fuente ku e programa di “Von Luca” lo bai ta otro for di tur otro. Ku e moveshon aki esaki ta nifiká ku e gran presentadó di Deporte na kanal 8 Alexander Makaya no ta forma parti mas di Kanal 8 i ku na su lugá ta bin sanger nobo den presensia di Jeftreck “Von Luca” Luciana. Nos fuente a bisa ‘E Mulina’, ku e luna aki mes “Von Luca” ta kuminsá laborá na tantu TCFM i TeleCuraçao.