21 Organisashon di Aliansa ta Sostené Marcha: TA BASTA!

173
Willemstad – Aliansa a tuma nota di 2 asesinato ku a tuma lugá den un temporada di tres siman. Konsiderando ku violensha ta oumentando den nos komunidat i espesialmente violensha kontra di hende muhé i mucha, kaminda esaki tin konsekuenshanan grave tantu pa e persona su famia i komunidat den su totalidat.

Tur hende tin derechi di bida. Ningun di nos, pa problema ku nos por tin ku otro tin e derechi di hunga Dios riba bida di otro hende; si un relashon no ta bai, bai laga e persona. Asesiná un hende muhé pa motibu e no ke hasi loke e hende hòmber ke, ta un krímen di marka mayor i mester kastigá sevéramente. Aliansa ta sigui bati bèl serka gobièrnu.

E petishon di Aliansa na mandatarionan ta pa yega mas lihé posibel na akshonnan konkreto pa medio di Plan Nashonal pa efektivamente ataka e problema di violensha doméstiko i abusu di mucha. No mester t’asina ku despues di kaba di lamentá kualkier suseso desagradabel ku manesé bida ta sigui manera nada no a pasa. Ta p’esei e enkargo di gobièrnu, organisashon no gubernamental i suidadano en general ta pa yega na un programa tantu di prevenshon komo di kuido pa víktimanan, nan famia i protekshon di esaki. Responsabilidat ta di komunidat en general.

Manera ya ta konosí, algun hòmber balente a tuma e inisiativa pa organisá un marcha kontra di violensha di hende muhé. Un inisiativa ku Aliansa ta aploudí i sostené. Aliansa ta hasi un yamada na pueblo di Kòrsou pa asistí djadumingu, 10 di novèmber na plasa Hariri pa huntu kana bai plasa Brion p’asina manda un mensahe ku TA BASTA ku violensha kontra di hende muhé. E marcha ta kuminsá 8:00 di mainta. E petishon ta pa tur hende presentá bistí ku un polo òf t-shirt blanku i na manga bisti un streki lila p’asina simbolisá e lucha kontra violensha. Pa esnan ku ke pone nan outo na plasa Brion lo tin bùsnan ta kore bai bini entre e dos puntonan for di 6:30 di mainta. Bùsnan ta para riba e tereno habrí banda di  edifisio di SSC. Pa esnan ku no por kana full e ruta, ta liber pa drenta e marcha na diferente sitio, entre otro na Misa di Wishi òf na Plantesrust. Aliansa ta konta ku pueblo di Kòrsou pa asistí na nos marcha djadumingu, 10 di novèmber pa 8:00 di mainta.