Kas di Beibel ku un bunita publikashon pa mucha

432
WILLEMSTAD,–Djasabra 9 di novèmber ta otro gran dia pa Kas di Beibel ora ku presentá un publikashon nobo pa mucha titulá Beibel di Prenchi.

Ta trata aki di un buki di prenchi diki yen di historia di Beibel, skirbi na Papiamentu di awendia i dirigí na muchanan entre 4 pa 7 aña.

E Beibel di Prenchi ta originalmente di Nederlands Bijbelgenootschap i Sosiedat di Beibel den Karibe Hulandes a haña pèrmit pa yega na dos vershon na Papiamentu. Spesial pa e pueblo di Aruba a traha riba un vershon na Papiamento etimológiko i pa Kòrsou i Bonaire a tradusí i adaptá  unu na vershon Papiamentu fonológiko.

Ilustradó di e Beibel di Prenchi aki ta Marijke ten Cate ku a pèrkurá pa ilustrashonnan masha kolorido ku ta kubri hinter e paginá. Den tur e 36 kapítulonan ku e buki di 280 página aki ta kontené, e ilustradó ta laga mira detayenan ku no ta presente den e historia skirbi. Na un manera masha atraktivo i fasinante teksto i ilustrashonnan huntu ta konta e historia di Tèstamènt Bieu i tambe di Hesus den Tèstamènt Nobo.

Pa yuda e mayor, maestro òf adulto ku ta lesa e buki huntu ku e mucha tin parti patras di e buki dos rubriká interesante i útil. Esta un skema históriko i un lista di konsepto bíbliko ku por konsultá promé ku lesa e historianan ku e chikitinnan.

Proseso di editá i imprimí e buki na Europa tabata unu kostoso pero ela resultá sigur den un di e bukinan mas bunita ku Kas di Beibel a yega di publiká. Hinter e ekipo ku a traha riba e buki ta spera ku lo e ta un medio  balioso den e esfuerso pa ofresé  nos muchanan Palabra di Dios den un format kolorido i atraktivo.

Presentashon ofisial di e buki aki ta tuma lugá Djasabra 9 di novèmber den kura di Kas di Beibel na Gaitoweg 3 di 4or pa 7 di anochi.

Kas di Beibel ta invita tur mayor ku ker pasa un ratu kontentu ku nan yunan pa bin libremente i gosa di presentashon di:

Angelitos i Family Youth Orchestra, Poppenkast i kontamentu di kuenta for di e Beibel di PrenchiI pa sera e atardi lo bai tin un bunita pelíkula riba pantaya grandi

Entrada grátis!