Ar’jany Martha a mira akshon den ‘UEFA Youth League’

130
Ar'jany Martha huntu ku un dirigente di Ajax.
INGLATERA—E hóben atakante di 16 aña di edat, Ar’jany Martha, oriundo di nos isla, kende ya Deporte Vigilante a kompartí tur informashon pa ku su desaroyonan den futbòl na Hulanda últimamente, tabata den akshon ayera den ‘UEFA Youth League’ na Inglatera.

Un ke otro mirando akshon pa e ekipo U-19 di e organisashon di futbòl di Hulanda, Ajax di Amsterdam. Tabata den wega ku e ekipo hulandes a hunga komo ekipo bishitante na Inglatera, kontra e ekipo similar di e organisashon di futbòl di Inglatera, Chelsea FC.

E wega ariba menshoná, tabata bálido pa grupo H di ‘UEFA Youth League’ i a finalisá empatá na 1 gol.

Ar’jany Martha di apénas 16 aña di edat, konosí for di un famia di diferente deportista, a inisiá na banki komo suplente i a drenta pa hunga durante di e último 10 minütnan di e partido. Esaki na momentu ku ya ámbos ekipo a anotá kaba den e wega.

E promé mitar di wega ku a hunga den stadion di Stamford Bridge na London, a transkurí ku e ekipo di kas den bentaha mínimo, unda e partido ta empatá den e parti komplementario.