Despues di 5 temporada ku Yankees…. Didi Gregorius lo por ta rumbo pa Cincinnati Reds

61
Didi Gregorius aki den unifòrm di Cincinnati Reds.
NEW YORK – Resientemente e ekipo di Yankees a rechasá di ofresé Didi Gregorius un ekstenshon di su akuerdo balorá na 17.8 mion dòler i konsekuentemente e shòrt stòp yu di Kòrsou, despues di 5 temporada ku e ekipo di Yankees, awor agente liber,  por firma ku e ekipo ku e ta deseá.

Didi Gregorius, ku na febrüari próksimo lo kumpli 30 aña, a bolbe bèk e temporada 2019, na kuminsamentu di luna di yüni, despues di a realisá un operashon Tommy John i a bati pa un promedio di .238 ku 16 ‘homerun’ i 61 kareda empuhá de 82 wega ku Yankees.

Segun diferente informashon, e ekipo di Cincinnati Reds lo tin un puesto kla pa Didi okupa, mirando ku nan shòrt stòp di e temporada tras di lomba, José Iglesias, tambe a kombertí su mes den agente liber.

E echo ku Yankees no a ofresé Didi un ekstenshon di akuerdo ta trese kuné ku Didi, ku ta drenta su di nuebe temporada den liga grandi, lo por firma ku e ekipo ku e ta deseá i por spera ku e lo skohe pa e mihó oferta ku e por haña.

E loke ta hasi Didi atraktivo ta ku no tin niun klóusula mará pa por firmé. Pues e ekipo di New York lo no risibí un selekshon di draft a kambio, komo kompensashon pa su firma. Reds sigur no ta un ekipo straño pa Didi mirando ku tabata netamente e ekipo di Reds ku na 2009 a firma Didi komo pelotero profeshonal i na 2012 a debutá ku e ekipo di Reds den liga grandi.