E di 16 edishon di ‘Ride for the Roses’

108
Dirigente- i trahadonan di Prinses Wilhelmina Fonds, huntu ku esnan ku a hiba palabra.
WILLEMSTAD—E di 16 edishon di e gran evento anual Ride, Sail, Swim i Walk for the Roses, lo tuma lugá riba dia 2 febrüari di aña 2020. Ta trata aki di e tradishonal evento organisá pa e fundashon di Ride for the Roses, patrosiná pa Orco Bank, ku e meta pa rekoudá mas fondo posibel den e lucha kontra di e malesa di kanser i alabes yuda pashèntnan di kanser i mesora tambe konsientisá un i tur pa prevení esaki.

Relashoná ku esaki, tabata ayera den oranan di atardi, ku a tene un konferensha di prensa. Un ke otro a tuma lugá den kurá di Orco Bank, unda ku representante di e diferente organisashonnan ku ta parti di hinter e evento i aktividatnan pa e kousa ariba menshoná a hiba palabra.

Curt Evertsz a habri e atardi, pa seguidamente Robbin Maertina di Ride for the Roses, Kenneth Canword, direktor di Orco Bank i señora Frida Keller di Prinses Wilhelmina Fonds a hiba palabra, dunando splikashon di e evento i aktividatnan ku lo bai tin próksimamente.

Entre otro dia 28 próksimo lo bai tin un sine, ‘Film for the Roses’, miéntras ku ayera tambe a ranka sali ku e luna ku ta duna informashon pa loke ta e malesa, na tantu esnan femenino komo maskulino, unda ayera a hasi un bishita na un barbershop pa duna info.

Tabata un atardi bon bishita, unda ku tambe a probechá pa gradisí tur esnan ku ta duna un man di un of otro manera i tambe mesora a inmortalisá e momentu, unda miembro, dirigente i empleadonan di tur e organisashonnan enbolbí a saka un pòtrèt huntu.

Pues kuminsá reserva dia 2 febrüari otro aña pa otro gran evento, unda un gran multitut lo ta huntu na pia, den laman i riba baiskel, ku un solo meta, pa yuda pa ku e malesa di kanser.