Minister Suzy Romer a primintí ku kos lo drecha pa Betesda

 E kas di kuido ta usando plaka di impuesto pa paga trahadónan:

133
Suzy Romer: Segun presidente di direktiva di Betesda e minister a primintí nan ku kos lo bai drecha pa nan.
WILLEMSTAD—Ayera pa 2:00 or direktiva di Betesda a yama un reunion urgente ku a konta ku presensia di su trahadónan. Un di esnan ku ma a hiba palabra durante dje reunion aki tabata Shirley Treurniet kende ta presidente dje hunta di direktiva di Betesda.  Ta asina ku durante dje reunion di ayera e trahadónan a keda partisipá di algun desishon.

Unu di nan ta ku nan a partisipá ku Liezelot Braaf a pèrdè kaso i ku entrante 15 di novèmber ta dr Rog lo keda apuntá ofisialmente komo direktor dje kas di kuido. Mester bisa ku ya pa algun luna e la bin ta ehersé su labornan komo esun ku ta dirigí e kas di kuido, pero ayera ku korte a dikta sentensia den e kaso di Liezelot Braaf, nan a disidí na anunsiá ken ta direktor entrante 15 di novèmber próksimo. Pa lokual ta trata e status finansiero di Betesda a bin pa dilanti ku enbèrdat nan ta usando e plakanan  destiná pa ontvanger pa paga e trahadónan. Den nan presentashon di ayera nan a indiká na trahadónan ku Betesda no ta e úniko kas di kuido ku ta hasiendo esaki8 i ku nan sa di algun mas ku ta hasi meskos.

Pa lokual ta trata e parti aki a anunsiá na e trahadónan ku Betesda lo kuminsá traha ku hospital, kua lo perkurá pa mas entrada pa nan. Ta asina ku for di 2011 e loke ku nan tabata risibí for di gobièrnu a keda igual. E echo ku nan ta bai traha mas estrecho ku hospital  hustamente lo yuda oumentá nan entrada. Direktiva e  partisipá na trahadónan ayera ku minister Suzy Romer a primintí nan ku kos lo bai drecha pa nan. Lokual ku tambe a ser trata ayera ta e preokupashon ku Betesda ta kana kuné ku tin informantenan den e kas di kuido ku ta suministrando Vigilante informashonnan interno. Nan a duna di konosé ayera ku nan komo Betesda tin full sosten di Jhonson Djaoen di CBV ku si sa ta ken ta sakando e informashonnan pafó ku nan lo tuma medida kontra di esun empleadonan aki. Hasta a duna di konosé di lo kit’é for di trabou i no solamente esei, pero revoká su lisensia komo bruder òf zùster.  Nan ta hibando nan investigashon na e momentunan ai pa sa kua t5a e empleadonan ku ta sakando e informashonnan. Hasta nan a duna di konosé ku nan tin sospecho kua ta e posibel trahadónan ku ta dunando Vigilante a informashon. Lokual ku a hala atenshon ta e parti ku nan a bisa si nan no a ripara ku ta den Vigilante so e informashonnan ta saliendo, bruando e tarea di un korant agresivo den buska informashonnan ku partisipashonnan via di komunikado ku tin di bai pa tur prensa.

Den e kuadro aki mester bisa ku  nan a partisipá durante dje reunion ku nan a tene kontakto ku un hefe di Vigilante pa sa ken ta dunando nos e informashonnan, pero ku e respuesta tabata ku no por divulgá fuente. Pa loke ta e parti aki a bini pa dilanti ku mester tin un forma pa obligá Vigilante pa revelá su fuente.  Shirley Treurniet a pidi e trahadónan masha ayera pa evitá ku nan ta tene kontakto ku prensa divulgando loke nan ku ta oasando na Betesda. Shirley Treurniet a pidi e trahadónan masha pa si nan tin kualke punto di preokupashon  pa aserka su persona libremente. Lokual ku e trahadónan a spera pa ser trata no a bin pa dilanti, esta ku tin pashèntnan ku malesa di kueru ku ta kai ku lo a kontagia koleganan di nan. Nada di esaki no a ser papia ayera. Diferente punto mas a ser trese dilanti ayera pa e direktiva di Betesda ku ta un kas di kuido ku tin kapasidat pa hospedá 175 pashènt.