Produkshon di kokaina mas grandi i profeshonal

104
mas laboratorio desmantelá
AMSTERDAM—Den programa Nieuwsuur polis ta informá ku produkshon di kokaina den Hulanda ta birando mas grandi i mas profeshonal.

Den laboratorionan di kokaina lo ta produsiendo míles di kilo di kokaina. Kada bes mas laboratorio ta keda desmantelá, loke ta nifiká ku tin kresementu den e kantidat. Polis ta papia di un produkto industrial. Den laboratorio di droga ta hasi hopi uso di aceton den produkshon di kokaina. Ofisialmente kompra di gran kantidat di aceton na Hulanda ta mara na kondishonnan, pero den praktika ta otro. Sin difikultat e produktornan di televishon a logra kumpra jerrycan ku 5 liter di aceton. Pa outoridatnan esaki ta preokupante pasobra ta produkto pa negoshi di uña of ferfdó. Di otro manera ta pa kriminalidat. Luna pasa Europees Waarnemingscentrum pa droga i adikshon a konstatá ku e merkado di kokaina ilegal a alkansá rekortnan. Esaki nan ta konkluí a base di kantidat di kokaina konfiská. A interseptá e droga den Belgika, Hulanda, Spaña i Fransia. E mundu di trafikashon i produkshon di droga ta kambia lihé. Awor ta hasi uso di cryptovaluta pa paga i kriminalnan ta komuniká via kombersashonnan seyá riba media sosial. E trafikashon ta bai hopi biaha via merkadonan riba darkweb.