SVB: Mas medida na kaminda. E biaha aki ta muchanan ta bai keda perhudiká.   
WILLEMSTAD—Promé SVB kier a tuma medida kontra dòkternan introdusiendo ku nan no ta paga nan mas, unabes nan kumpli 65 aña di edat. Despues a resultá ku SVB a bai un gera tambe kontra speshalistanan. Último tabata e quota límite stipulá pa e profeshonalnan ku ta duna terapia físiko.

Den kaso di Wit Gele Kruis tambe nan a bin ta primi un poko riba nan. Awor ta resultá ku nos muchanan ku mester di kuido pa nan djente tambe ta bai keda perhudiká.  Ta asina ku míles i míles ta paga nan prima tur luna, di moda ku nan por kontribuí den e fondonan di SVB i pa dia ku nan mester e gastunan médiko keda kubri. Pa lokual ta trata e muchanan ku tin di yena djente semper esaki a keda kubri, pero segun informashonnan optené pa Vigilante a surgi un kambio den esaki tambe. Dentistanan a keda pone na altura ku SVB lo bai stòp di kubri e tipo di gastu aki. Esaki ta trese kuné ku ta e mayornan mes lo mester kubri e gastu di yenamentu di djente di nan yu, segun nos a keda informá.