Den kuadro di solidaridat kolektivo di kontribushon i pago di belasting, tin e ambishon pa yegá na solushonnan struktural?

149
Curtley Obispo
Willemstad—Ta ku un mihó solidaridat kolektivo di kontribushon i pago na tempu di belasting mester aportá na un Finansa publiko stabil di Pais Kòrsou i tambe garantisá gastunan kolektivo na bienestar i progreso di nos tur ku ta biba aki na Kòrsou.  Mas mihó e solidaridat kolektivo di kontribushon i pago na tempu di belasting ta a base di leinan di Pais Kòrsou, ta ménos sèn tin riba kaya ku ainda tin ku bai kobra.

Sifranan for di 10 òktober 2010 te ku 31 desèmber 2019 ta mustra ku e solidaridat kolektivo di kontribushon i pago na tempu di belasting no ta sufisiente, kual a tambe a yuda krea défisitnan operashonal riba e strepi pa ku Kuenta Koriente di Pais Kòrsou. Den e periodo ariba menshoná ta lapi a lapi e défisitnan operashonal nan, ku entradanan no struktural di dividendo di kompanianan anónimo di Pais Kòrsou, NFR/ BRK i reservanan. Kual ta mustra ku ainda no a yega na e solushon struktural: ku tur kontribuyente mester aportá segun leinan di Pais Kòrsou na e kontribushon  i pago kolektivo na tempu di belasting.

P’esei den reunion di Komishon Sentral di Parlamento di Kòrsou di dia 22 òktober 2019, parlamentario Curtley Obispo a base di su análisis atrobe a bolbe hasi su opservashonnan, remarkenan i preguntanan skerpi i kritiko riba e Nota di Finansa di  Presupuesto 2020 di Pais Kòrsou.  E la mustra  entre otro riba e hecho ku  ta presupuestá sierto entradanan di pais Kòrsou a base di e prinsipio di “behoedzaam” (kouteloso). Manera ta menshoná 8 biaha den Nota di Finansa.  A base di esaki e no ta mira den e sifranan presentá e ambishon i e un tarea fiho (“taakstelling”) di kobra segun leinan di Pais Kòrsou e mas di 700 mion florin ku Pais Kòrsou tin riba kaya. Esaki a base di e prinsipio moral ku un mihó solidaridat kolektivo di kontribushon kolektivo di belasting di tur kontribuyentenan ta bon pa Finansa públiko di Pais Kòrsou.

P’esei parlamentario Curtley Obispo a hasi entre otro e siguiente preguntanan na Minister di Finansa señor Kenneth Gijsbertha: (1) Dikon den e Presupuesto 2020 di Pais Kòrsou no tin e ambishon i tarea fiho (“taakstelling”) pa kobra e mas di 700 mion florin ku Pais Kòrsou tin riba kaya den aña 2020, 2021, 2022 i 2013?; (2) Logeergastenbelasting: ta presupuestá pa aña 2020 sero mion florin. Unda e 90 mion florin ku Pais Kòrsou tin riba kaya di logeergastenbelasting a keda? Keda sin kobra den aña 2020 ta un opshon? Si òf No. Dikon si òf No? ; (3) Motorrijtuigenbelasting: Ta presupuestá pa impuesto di vehíkulo un subida “behoedzaam” (kouteloso) di 0.3 mion florin (aña 2020 vs 2019). Tin un mínimo di 30 mion florin ku Pais Kòrsou tin riba kaya ainda pa kobra. Keda sin kobra e mas di 30 mion riba kaya ta un opshon? Si òf No. Dikon si òf No?. Dikon no ta bai introdusí un plachi number nobo pa vehíkulo den aña 2020 pa trese òrdu bek i asina garantisá entradanan di Pais Kòrsou?