Hensley Meulens no ta den e lista final…. Joe Espada ta lusi komo faborito pa dirigí San Francisco Giants

59
Joe Espada ta e kandidato faborito pa dirigí San Francisco Giants.
SAN FRANCISCO – Seis di e ocho puestonan vakante pa mènedjer di Liga Grandi ya a keda kubri i awor ta únikamente e ekipo San Francisco Giants i e ekipo di Pittsburgh Pirates ta e dos ekiponan ku ainda no tin un mènedjer asigná. Pero tur kos ta indiká ku un di nan lo ta hopi serka tambe di konkluí ku e proseso di búskeda aki.

Di akuerdo ku un informe ku e keda publiká pa “San Francisco Chronicle”, e ekipo di Giants lo a redusí nan lista di kandidato na únikamente tres nòmber. Ta trata aki di Gabe Kapler (eks dirigente di Phillies), e puertorikeño Joe Espada (instruktor di banki di Astros) i Matt Quatraro (instruktor di banki di Rays).

Esaki mes ora ta nifiká ku ofisialmente e yu di Kòrsou Hensley Meulens, menshoná anteriormente komo un kandidato faborito pa remplasá Bruce Bochy, a keda for di e lista final di e posibel kandidatonan pa mènedjer di Giants.

Pedro Grifol, Bob Geren, Mark Kotsay, Will Venable i Ron Wotus tambe ta otro kandidatonan ku a kai for di e kontienda pa e puesto aki.