Mester di mas klaridat riba desaroyonan rondo di Buskabaai NV

136
Mester di mas klaridat riba desaroyonan rondo di Buskabaai NV

Willemstad –Frakshon di PIN den Parlamento, representá pa Rennox Calmes a manda un karta pa Minister di Finansa pidiendo informashon riba status dje asina yama “asfaltmeer” den Emmastad ku ta responsabilidat di  Buskabaai NV. Buskabaai ta un kompania di Gobièrnu.

Ta konosí ku na 1985 ora e refineria SHELL a bandoná Kòrsou, esaki a laga un desaster ekológiko grandi atras. Ta un sekreto públiko ku SHELL a afektá nos naturalesa i sistema ambiental pa medio dje konosido “asfaltmeer” den kual sobra di derivadonan tabata wòrdu di “dump”. Buskabaai NV na 2006 a sera un kontrakt ku Asphalt Lake Recovery NV (ALF) pa manehá  “asfaltmeer” i transformá  e desaster ekológiko ku tin den e “asfaltmeer” den “asfalt” i/òf otro produkto pa bende. E aktividatnan di ALF den e “asfaltmeer” mester a resultá tambe den saniamentu dje “asfaltmeer”. Nos a komprondé ku ALR lo mester a prosesá un mínimo di 80.000 tòn pa aña. Na final dje proyekto e parti dje terenonan ku ALR logra sania lo mester a wòrdu kombertí i usa pa propósitonan komersial, industrial i tambe portuario.

Teniendo na kuenta ku Buskabaai NV tin mas ku 3 aña sigui sin entrega nan Kuenta Anual, Sr. Calmes a aserka e titular di finansa, Sr. Gijsbertha ku algun pregunta. Sr. Calmes ta interesá pa risibí informashon kon a para ke desaroyonan pa saka e “asfalt”, kombertí den produkto i tambe sania e “asfaltmeer”. Tambe Sr. Calmes kier sa ku ALR a kumpli ku e produkshon ku mester a hasi pa por finalisá e proyekto aki. Kuantu tereno ta kla i ta wòrdu usa pa propósitonan komersial, industrial òf portuario tambe ta un dje tópikonan riba kual Sr. Calmes a pidi aklarashon. Ta importante pa sa di esnan ku tin algun aña kaba ta traha  riba e “asfaltmeer” ke terenonan aki por wòrdu transformá den otro produkto i mas importante si e terenonan por wòrdu sania. Dje forma aki nos por amplia nos konosementu. Finalmente status dje kuentanan anual ku Parlamento no a risibí for di 3 aña pasa i e posibel rísiko di no risibí entrada òf “dividend” via Buskabaai NV pa Gobièrnu tambe Sr. Calmes a manda pidi e Minister di Finansa.•