Pa su mal komportashon aparentemente…. Entrenado ta kibra relashon di trabou ku e atleta Jamile Samuel

51
E entrenadó Bart Bennema a kibra su relashon di trabou ku Jamile Samuel.
AMSTERDAM – E atleta hulandes Jamile Samuel aktualmente ta en buska di un entrenadó nobo. Un notisia sigur nada bon mirando ku weganan olímpiko ta den porta. Ta asina ku su entrenadó (entretantu eks entrenadó) Bart Bennema ta kompletamente kla ku e komportashon di Samuel i a disidí ku e ta kibra ku e relashon di trabou entre nan.

“Mi ta haña ku Jamile a demostrá un forma di komportashon ku mi no por a superá na dado momentu mas. Mi a trata di splik’é esaki di e forma mas komprendibel posibel”, asina Bennema a komentá na prensa, pero sin a bai den mas detaye relashoná ku su desishon.

“Naturalmente mi ta deseá Jamile tur klase di éksito den su karera. Mi ta konsiente tambe si ku e momentu aki ta unu hopi desafortuná, prinsipalmente awor ku nèt e la kaba di realisá un operashon. Lo mi sòru si pa e tin un bon transferensha i komo entrenadó di e selekshon hulandes di mes lo mi brind’é un orientashon óptimo den futuro.”

Pa loke ta e atleta Jasmine Samuel mes, te ainda e no por komprondé ta kiko a bai robes. “Mi no por komprondé. Detayenan chikí mester por keda resolvé i sigur e ‘timing’ ta unu hopi fèrfelu mirando e tempu krap ku tin pa loke ta weganan olímpiko. Ademas debí na mi leshon mi tabatin un aña hopi difísil.”