‘Sontje’ Hansen hungando ku un ènkel poko leshoná

134
Orguyoso mama huntu ku su 2 yunan futbolista.
WILLEMSTAD—Durante di e último dianan, Deporte Vigilante ku frekuensia a bin ta kòmbersá, un biaha mas, ku señora Sonaida Hansen, kende ta mama di e futbolistanan di fam Hansen, kende ta Ricky i tambe ‘Sontje’.

Un ke otro despues ku Ricky, manera ya a keda publiká e siman aki, a firma un kontrato pa 2 aña den futbòl na Brazil.

Miéntras ku ‘Sontje’, ta destakando inmensamente den e kampionato mundial U-17 ku ta tumando lugá na Brazil. Un ke otro komo parti di e selekshon di Hulanda.

‘Sontje’ durante di e último 2 weganan a anotá 5 di e 7 golnan ku e selekshon Oraño a anotá. Esaki repartí den 2 djasabra kontra Merka i un hattrick djamars último kontra Nigeria, kual resultadonan tin Hulanda den kuartfinal aktualmente.

Ta trata di un señora, positivo i optimista, kende sigur ta animá i motivá su yunan i biba ku nan logronan. Esaki unda ku ya den pasado, Deporte Vigilante a hasi un publikashon di e desaroyo di e futbolistanan, den nan deporte preferí.

Miéntras tantu e senjora mama a splika ku Ricky, kende ta un mediokampista di 18 aña di edat, ya a splika i manifestá su deseonan pa por hunga pa selekshon di Kòrsou, unda ku inkluso ya tékniko Remko Bicentini ta na altura di su deseonan.

Pa loke ta e yu mas hóben, e atakante i goliadó ‘Sontje’, esaki si ainda no a yega na su desishon final, pero si tambe ta pendiente.

“Dimes Sontje ta hungando for di su 13 aña den selekshonnan di Hulanda. Den futuro ku esaki lo no ta e kaso mas, sigur e tambe lo ta kla pa hunga pa Kòrsou”, e mama a deklará.

Riba e aktuashon di su yu den mundial e señora mama la splika lo siguiente:

“’Sontje’ su promé wega no tabata masha kos. E tim kompletu tabata poko for di forma i kisas mester a adaptá na e tereno, kual a pone ku e no a sobresalí. Tékniko a opta pa laga ‘Sontje’ na banki den di 2 wega, kual tabata motibu ku e tabata rabiá i bastante desapuntá. Mi a motiv’é, unda pa den su próksimo aktuashon e por ta mas skerpi i demostrá kiko bèrdat e por, kual tambe e la kumpli i ta destakando.

Algun siman pasá den wega di Youth League na Amsterdam, ‘Sontje’ a leshoná su ènkel. Tur esaki unda ku ainda a no ta kompletamente fet i ta hunga ku e ènkel di teip, kual tambe ta hasi doló. Pues ta un otro faktor ku kisas a strob’é di destaká for di inisio i hungando riba un tereno ku mester a adaptá na dje”, señora Sonaida Hansen a duna di konosé, konfirmando di ta konvensí ku e ekipo hulandes, lo yega final den e kompetensia mundial ku ta tumando lugá na Brazil, unda ku apesar di su leshon, ‘Sontje’ ta sakando kara.