Sybren Boekhoudt i Hugo Limon ta gana ‘scoth double’

70
E finalistanan di e torneo.
WILLEMSTAD—Resientemente e Federashon Biar Kòrsou a organisá pa promé biaha e kampionato di Kòrsou ‘scoth double’, den e disiplina di Bola 8. 13 pareha a partisipá, unda finalmente den e promé partido di kuartfinal den buèlta di ganadó, tabata e pareha formá pa Raymond Magdalena i Norvin van Gurp, ku a gana di Salim Kuzi i Alun Huang, ku skor di 6-1.

Den e otro partido di kuartfinal, e viktoria a bai pa e pareha Michael Arvelo i David Prins, ku a gana Sybren Boekhoudt i Hugo Limon 6-5.

Den semifinal Arvelo/Prins ta gana i pasa pa final, ganando Magdalena/ van Gurp 6-4.

E pareha Boekhoudt/Limon ku a mustra bon dominio di wega ta gana e parehanan Kuzi/ Huang 5-4 i seguidamente tambe Magdalena /v Gurp  5-3.

Finalmente tabata den e partido final di e kompetensia, ku e kombinashon Boekhoudt/Limon tabata imparabel, demostrando tremendo táktika di wega i no papia mes di bon posishonamentu di e bola blanku, kual tabata e arma prinsipal pa nan por a bai ku e viktoria, ku skor di 7-3.

E resultadonan final tabata, empatá na puesto 5, e duonan Karl Vervuurt/Jimmy Rol i Ryan i Johnny Hellmund. Puesto 4 a bai pa Salim Kuzi/Alung Huang. Puesto 3 pa Raymond Magdalena i Norvin v Gurp.

Supkampion a resultá David Prins huntu ku Michael Arvelo, mientras ku e kampion di Kòrsou a resultá Sybren Boekhoudt i Hugo Limon.

Dirigente i alabes organisadónan ta felisitá e finalistanan i probechá mesora pa gradisí e patrosinadònan Montana Bierhuis i House of Billiard Play.