Ta trata di e atakante Elton Kabangu…. Fiskal a pidi nuebe luna di prizòn pa futbolista atakante di Willem II

52
E atakante Elton Kabangu di e ekipo Willem II.
BÈLGIKA – Fiskal di Halle-Vilvoorde na Bèlgika ayera lo a pidi un kastigu di prizon di nuebe luna pa e futbolista di Bèlgika, Elton Kabangu, atakante di e ekipo hulandes Willem II. Esaki ta loke ku prensa di Bèlgika a publiká ayera.

Ta asina ku e atakante di 21 aña di edat lo a pone su kuenta di banko na disposishon di un grupo di estafador, ku na 2018 lo a trata di hòrta 5000 euro for di un hòmber di edat avansá na Affligem. Danki na un akshon rápido di su banko, e transakshon aki no a keda realisá.

Mirando ku e futbolista Elton K. su historial kriminal ta limpi, ministerio públiko lo ta dispuesto pa bai di akuerdo ku un straf kondishonal. E futbolista mes, pa medio di su abogado, lo a pidi pa apsolushon.

“Komo futbolista e ta gana su bon pan di kada dia. Ademas e no sa nada relashoná ku e kaso aki mes”, asina e abogado a argumentá na e wes. Dia 27 di novèmber próksimo e wes lo dikta un sentensia den e kaso aki.