Transishon organisatorio di Sehos pa CMC ta yen problema

168
Otrobanda—E proseso di transishon di Sehos pa CMC ta mal pegá na nivel organisatorio. Miéntras na nivel tékniko, por bisa a logra hopi detaye, na nivel organisatorio, e.o. proseso primario di kuido i adaptashon di organisashon, kosnan ta leu fo’i kla.

Ayera tabatin un kaso den korte sivil, unda por a nota e konsekuenshanan di konseheronan kende a atendé e proseso di transishon na Sehos sin tabatin niun konosémentu adekuá lokal riba lokual por keda denominá komo Burokrasia Profeshonal. Esta, den otro palabra, durante kambionan organisatorio, ta spesialistanan ta e faktor determinante den un klínika di kuido médiko. Ayera Vigilante a papia ku dos spesialista, kendenan a duna di konosé ku nan mes no por komprondé ta kon ta suplikando kasi 61 mion na konseho i transishon miéntras e diseño di kambio no ta unu adekuá. Unu dje spesialistanan a hasta a duda si e transishon práktiko ta bira responsabel debí na rumornan ku nan mes a tende e siman aki. Den kuadro di esaki Vigilante a manda pa relashonista públiko dje proyekto di hospital nobo Clifton Walle for di djamars un seri di pregunta miéntras ayera a manda algun dje preguntanan tambe pa Gilbert Martina, e enkargado prinsipal di e proseso di transishon i maneho. Te ku ayera anochi, Vigilante no a risibí niun reakshon.

Te ku ougùstùs i sèptèmber último, Ministerio di Salubridat Públiko a manda un rekuento di un kostonan di e hospital nobo i tambe e suma ku a suprayá e presupuesto. For di esaki, ta konkluí ku apesar di a paga miónes na konseheronan, tòg e transishon di Sehos pa CMC no ta konforme e invershonnan . E.o. tin sumanan anotá di 48 mion florin pa transishon, 7 mion pa MRT i Entidatnan di HNO mas 6 mion pa SONA i un suma adishonal di 20 mion florin pa finansiá kapital di trabou. Manera menshoná a trata na drenta den kontakto ku representantenan di e proseso nobo na CMC pero sin resultado. Awor tin sospecho ku CMC tei habri sin dos departamento importante. Instalashon di CathLab, segun unu dje spesialistanan  ta leu fo’i kla miéntras Radiologia tampoko lo no bini kla na tempu. Riba esaki ni Gilbert Martina ni tampoko sr. Walle no a duna un reakshon.

Segun presidente di Cft, CMC no ta bai haña niun depchi pa finansiá nan kostonan a korto plaso ku suprayá nan presupuesto, pasobra nan no den kategoria di invershon pa kapital. Esaki ta un problema hopi serio. Un otro pregunta ku no tin kontesta ariba ta e sospecho ku CMC a manda súplika Sehos pa fia nan 2 kama di operashon, despues ku nan mester a bestèl 6 nobo i kai 2 kòrtiku. E desishon pa habri portanan di CMC, manera minister Camelia Romer a bisa ta keda den man di Inspektor dr Servin Keli.