Preparando pa kampionato futbòl FFK 2019/2020

173
DT Bernabela despues di bira supkampion di kampionato a bira kampion di pretemporada ku Scherpenheuvel.
WILLEMSTAD—Deporte Vigilante ku bista riba e kampionato 2019/2020 di futbòl FFK, den promé divishon, ku lo ranka sali djadumingu benidero, dia 10 novèmber 2019, a tira un bista i analisá e diferente ekiponan ku lo ta den kompetensia.

Ta trata aki di 10 ekipo, unda ku Hubentut Fortuna lo ta di regreso despues di a promové, unda e samineronan di Jong Colombia a degradá.

Despues ku bala kuminsá lora djadumingu awó, ta e intenshon pa e kampionato tèrminá riba djadumingu dia 28 yüni di aña 2020, unda pa 6’or atardi, lo bai tin e enkuentro final den Stadion Ergilio Hato.

Miéntras tantu awe nos lo tira un bista riba e ekiponan ku tabata e finalistanan di temporada tras di lomba. Ta trata di e kampionnan di Vesta i e supkampionnan di Scherpenheuvel, ku hustamente lo enfrenta otro, den nan promé wega di temporada, otro siman djasabra dia 16 novèmber próksimo, pa 9’or di anochi den Stadion Antoine Maduro.

Seguidamente mañan nos lo pone atenshon na e ekiponan ku lo mira akshon djadumingu benidero, den enkuentro ku lo duna apertura di kampionato 2019/2020, pa 6’or di atardi, den Stadion Ergilio Hato, ora ku Undeba i Victory Boys enfrentá otro

Ta trata di kampionato ku lo ta dediká na 5 diferente baluarte di e deporte rei riba nos isla, den personanan di eks dirigente di futbòl Angel Ramirez, huntu ku eks rèfri, kende tabata riba lista di FIFA, Erik ‘Papa’ Girigoria i tambe eks futbolistanan Ramon Stomp, Virgilio Sillie i Arto Leito.

Vesta

E ekipo kampion di temporada tras di lomba, di e bario di Sta Maria i bisindario Vesta, dirigí pa Henry Caldera, lo bai sinti falta di nan kiper na inisio di e temporada nobo. Un ke otro unda ta trahando pa asina por logra keda kla ku e kiper kolombiano, eks trikolor Julian Gaviria, mas lihé ku ta posibel.

Relashoná ku esaki lo bai inisiá temporada ku un kiper hóben, despues ku tabata e intenshon pa konta ku kiper Albertus di ‘Seru’, kende lo a opta pa keda kas. Tur esaki tambe ku bista pa ta debidamente prepara pa Concacaf Caribbean Club Shield ku lo hunga otro aña na luna di aprel.

Pa loke bta karanan nobo, ku e ekipo lo konta kune tin Charles ‘Chalie’ Martina i tambe Kenneth ‘Kenny’ Kunst, ámbos eks trikolor i tambe Joel ‘Jowi’ Victoria for di Centro Dominguitu. Miéntras ku tin tambe algun hoben prometedor, unda sigur e mediokampista di fam Daal, lo por bai ta un atrakshon den nos futbòl.

Esaki unda ku tur probabilidat Vurgel Bekeer, lo bandoná e ekipo i rumornan ta indiká ku Jerry Cleofa, lo por pone un fin na su karera futbolístiko.

E ekipo kampion tin un ekipo ku lo e por duna bataya kuné i por defendé nan titulo baletemente.

Scherpenheuvel

E ekipo supkampion dirigí pa Kenneth ‘Bob’ Bernabela, a logra e titulo máksimo den e torneo di kalentamentu organisá pa Vesta.

Un ke otro unda nan a bari ku premio, logrando tambe e máksimo goliadó i premio di e mihó kiper di e torneo. Den e torneo aki, por a tuma nota di ousensia di entre otro Nicolas Rocha Gomez i Freddy Hernandez, pero a mira e hungadó kubano, atakante kende ta konosí den futbòl riba nos isla ku e ekipo di ‘Seru’, Joan Godinez Fuentes, durante di e promé fin di siman di e torneo.

Mas aleu no tin muchu kambio den e ekipo, unda tabatin rumor ku Hernandez lo djòin Undeba, Rocha a regresá kas i no ta na altura ku lo e regresá ainda i tin otro miembronan ku no tabata titular ku tambe a move pa otro ekipo.

E ekipo supkampion ya a demostrá ku nan ta keda un di e faboritonan, despues di a gana Torneo JP-33, di forma invikto.