Rekompensa 15.000 pa paradero víktima

126
hòmber (56) pèrdí for di yüni
BREDA—Fiskal mayo di Breda ta otorgá un rekompensa di 15.000 euro den investigashon di desaparishon di un belga.

Ta trata di Johan van der Heyden (56) ku ta pèrdí for di 2 yüni. E suma ta bai pa e persona ku por duna un tep pa solushoná e kaso. Polis no ta kere ku e hòmber ta bibu mas. Anteriormente polis a kere ku lo a mata e hòmber i kort’e na pida. A detené dos dama di Steenbergen dia 5 oktober: un mama (39) ku su yu muhé (18). Dia 23 oktober korte a prolongá nan detenshon ku 90 dia. Yüli último tambe a detené un dama na Belgika. Pa polis hasta despues di e detenshonnan nan no sa kiko a pasa, posiblemente tin mas sospechosonan. Ayera polis a hasi investigashon den munisipio di Steenbergen na diferente lokalidat kaminda ta interogá habitantenan. Un pregunta ta tokante e outo di e víktima ku tabata para largu tempu. E hòmber lo a bandona su kas na Lint den yüni. Nunka mas a mir’e. e investigashon di outoridatnan belga a kondusí na Hulanda. Tin imagen di su outo den direkshon di Bergen op Zoom. Despues ku el a pèrdè a haña e outo bashí den Den Bosch.