Zeus de la Paz a opta pa keda ku su ekipo

158
Zeus de la Paz.
WILLEMSTAD—Deporte Vigilante despues di algun tempu di tabata intentá sin ta logra, tabata ayera ku un biaha mas a logra komuniká ku tékniko di nos selekshon nashonal di futbòl Remko Bicentini.

E kontakto aki, tabata pa por a informá riba nos selekshon i entre otro motibu di ousensia di algun di nos futbolistanan.

Remko a splika di ta hopi optimista pa e wega di otro siman kontra Costa Rica, apesar di sa ku lo no bai ta un wega fásil i lo konta ku sosten di Kòrsou kompletu.

Pa loke ta e futbolistanan ousente, riba pregunta di Deporte Vigilante, Remko Biceninti a splika ku kiper Zeus de la Paz awor ta titular den su ekipo i ku nan kampionato ta sigui, unda ku e ekipo lo mester hunga 2 wega durante di e periodo ku lo e mester ta na Kòrsou. Esaki a pone ku huntu ku su dirigentenan, e la opta pa keda ku su ekipo.

Jafar Arias no a keda konvoká pa motibu ku tin mas hungadó riba su posishon ku a skohe p’e i ademas ku tin diferente otro hungadó tambe ku si por keda uzá na diferente posishon.

Gervane Kastaneer a regresá di un leshon basta ferfelu i ainda no ta kompletamente rekuperá, pero ta hañando su minütnan, pa asina e drenta bèk den ritmo i rekuperá kompletamente.

Jarchinio Antonia tampoko ta kompletamente fet, apesar di ta hungando ku Cambuur, unda ku e futbolista mes a opta pa si ta nesesario so e ta presente.

Nigel Robertha si manera ya ta konosí a opta pa tòg keda ku speransa pa Hulanda.

Cuco Martina ta rekuperando i ainda no a subi tereno ku su propio ekipo. Nos kapitan ta trahando duru i tabata interesá, pero ainda tabata muchu trempan pa e por a bandoná su ekipo durante di su proseso di rekuperashon.

Miéntras ku Charlison Benschop ta bèk, despues di tabata den un situashon ferfelu na FC Groningen. Tur kos ta tras di lomba, despues ku segun Remko ta riba desishon di e futbolista mes e tabata ousente ta ku e wega na Costa Rica, pero miéntras tantu lo tei pa otro siman, despues ku inkluso nan a kòmbersá riba susesonan ku tabatin.

Finalmente Bicentini a duna di konosé tambe ku Darryl Lachman tambe ta kompletamente rekuperá i lo tei pa e wega di djaweps próksimo, despues ku for di djaluna awó e delegashon ta na Kòrsou.