OTROBANDA — Minister di Salubridat, Medio Ambiente i Naturalesa (SMN) señora Suzy Camelia-Römer ta impreshoná ku e posibilidatnan ámplio i avansá di tèst ku ADC ta brinda tantu e pueblo di Kòrsou komo e Curaçao Medical Center (CMC) ku lo habri su portanan den e próksimo dianan.

Esaki por konkluí despues di un rekorido informativo ku e mandatario a hasi awe, djamars 12 di novèmber 2019, na laboratorio nashonal ADC su lokalidatnan den Otrobanda. E rekorido a inkluí ADC su laboratorio nobo di Kímika Klíniko i Hematologia (‘KCH’) na Roodeweg i tambe e departamentunan di Patologia i di Diagnóstiko Molekular. Lihé i sigur E manera modèrno ku ADC ta organisá su servisio – por ehèmpel ku un buizenpost pa transportá material pa tèst di forma lihé i sigur entre ADC Roodeweg i sinku departamentu di CMC – a hala Camelia-Römer su atenshon.

Pa minister Camelia-Römer e kombinashon di aparato sofistiká, dominio di materia i organisashon optimal di trabou ku el a eksperensiá durante su bishita na ADC, ta prueba ku Kòrsou por konta ku un servisio di laboratorio na nivel i di kalidat haltu.