Atrakadó ta baha di dak maltratá chines bai ku sèn i vehíkulo

341
Willemstad— Polis mester a bai Juan Hatoweg unda un famia chines a keda atraká den nan kas i tambe nan negoshi.

Den oranan di mardugá atrakadónan a logra di baha di dak den e negoshi di e chinesnan ku ta situá riba Juan Hatoweg. Ta trata di un negoshi chines unda e komersiantenan tin nan bibienda tambe pega na esaki. A logra di baha den e bibienda di e chinesnan unda bou di menasa a kuminsá pidi pa sèn. Pa por a pone mas preshon tras di esaki a dal e chines ku kabu di pistol den kabes kousando un herida. Despues di a poderá di e sèn a bai tambe ku un SUV ku ta pertenesé na e famia chines. Mester a pidi asistensia di ambulans pa asina e víktima chines por a haña yudansa na e herida ku tabatin na su kabes.  Mas den oranan di mainta Polis a bin topa ku e vehíkulo di e famia chines bandoná den e bario di Kura Piedra na altura di Maduro School. A konfiská esaki miéntras tim di atrako a keda enkargá ku e investigashon.