Vise presidente di parlamento Eugene Cleopa: Miéntras no yena vakatura no por duna retiru na Doran i Moses

483
Cleopa ta bisa ku e no por duna komentario riba karta ku un frakshon a manda parlamento, sin ku el a tuma nota di e kontenido di e karta i na momentu ku e hasi esaki, e lo duna kontesta na e frakshon.

Willemstad,– Señor Eugene Cleopa Vise presidente di parlamento ta splika tokante komishon di preparashon enkuesta parlamentario riba Hospital Nobo Otrobanda CMC. E ta bisa ku e no por bai den detaye riba e komishon aki, debí na reglanan di parlamento. E ta bisa ku señor Obispo ta esun ku ta enkabesá e komishon i ta esun ku lo por papia na nòmber di e komishon.

Frakshon di MFK na nòmber di Lider di Frakshon señor Gilmar Pisas huntu ku señor Gilbert Doran a manda un karta pa presidente di parlamento dia 30 di sèptèmber 2019, ku ta mas ku un luna pasa ku e petishon pa eksonerá señor Doran for di e Komishon temporal pa preparashon investigashon HNO manera proponé dor di Komishon Sentral den e reunion di dia 11 di sèptèmber 2019 (Komishon). Señor Cleopa ta mustra ku komo presidente di parlamento el a risibí dos karta, respektivamente di Moses i Doran i ora el a yega e kartanan tabat’ei kaba i el a kontesta e kartanan debidamente, pero lei no ta duna espasio pa hasi masha kos. Señor Cleopa ta bisa ku e ta komprondé  e puntonan ku e miembronan di parlamento aki a manda, pero ta den komishon sentral por atendé esakinan.

Di parti di MFK nan ta bisa ku den nan karta nan a duna 3 motibu bálido, dikon nan ta di opinion ku mester eksonerá señor Doran for di e Komishon. Ta inaseptabel ku despues di 30 dia ku nan a manda e karta ainda Vise-Presidente di Parlamento no kier asumí su responsabilidat, tratando di yena e vakatura ku lo a surgi. Indikando ku e vakatura di kolega Doran lo wòrdu yena asina tin un remplasante pa okupá e puesto ku lo bira vakante i ku bo lo informá señor Doran despues di esaki.

Cleopa ta bisa ku pa su persona honra e retiru di e miembronan aki, e mester yena e puestonan ku dos otro hende, pues lei ta obligá su persona ku pa e retirá e dos personanan aki, e lo mester a nombra dos otro hende, pero esaki no a tuma lugá paso e no por a haña dos otro hende ainda i konsekuentemente e dos personanan aki ta keda miembro.

E ta bisa ku e no a haña niun informashon di ku e komishon no tin korum i no por funshoná.

Cleopa ta bisa ku e no por duna komentario riba karta ku un frakshon a manda parlamento, sin ku el a tuma nota di e kontenido di e karta i na momentu ku e hasi esaki, e lo duna kontesta na e frakshon.

Señor Cleopa ta bisa tambe ku ta nesesario i importante pa komunidat sa e bèrdat rondó di HNO i ta solamente un enkuesta lo por trese esaki i pues e ta spera ku finalmente nan komo miembronan di parlamento lo hasi lo máksimo pa en todo kaso komunidat sa kiko a tuma lugá pa ku e hospital ku djabièrnè awor lo habri su portanan di forma ofisial. “Tur hende kier sa si realmente kada depchi ku a ser usa a ser usa responsablemente”, asina Cleopa a duna di konosé.