CTB a entregá kuentanan anual te ku aña 2017

263
Punda–  Resientemente Ofisina di Turismo di Kòrsou (CTB) a tuma nota den un korant lokal ku a hasi menshon di e echo ku Curaçao Tourism Development Foundation (CTDF) a entregá kuentanan anual te ku aña 2011.

E korant a referí na un dokumentashon di College Financieel Toezicht (CFT) den kual e informashon aki ta menshoná. CTB su kuentanan anual di aña 2012 te ku 2017 ta entregá na Ministerio di Desaroyo Ekonómiko (MEO) ku ta e Ministerio bou di kua e fundashon ta resortá. Via di MEO e kuentanan anual ta keda entregá na Ministerio di Finansa. Tambe CTB ta manda tur aña kopia di su kuentanan anual pa Ministerio di Asuntunan General (AZ), Stichting Overheids Accountants Bureau (SOAB) i Centraal Bureau voor de Statistiek (CBS).

Di CTB su banda a tuma kontakto kaba ku MEO pa asina deliberá di ki manera por koregí e situashon aki pa sigurá ku den futuro e kuentanan anual por yega serka e instansianan ofisial ku ta hasi uso di e informashon aki. Tambe MEO a indiká di lo bai sòru pa di awor pa dilanti e informashon den e relato finansiero mensual di Ministerio di Finansa (FMR) ta aktualisá. Pa loke ta trata e rapòrt di e kuentanan anual di aña 2018 esaki ta kla i CTB ta pendiente pa pronto entregá esaki na MEO i e demas instansianan ofisial pa kual CTB ta manda su kuentanan anual.