Petishon pa yudansa den kaso di asesinato na Campo Alegre Resort

4050
Willemstad—- Polis ta pidi yudansa pa asina resolvé e kaso di asesinato ku a tuma lugá na Campo Alegre na unda e personal di vigilansha a bin pèrdè su bida.

Relashoná ku un kaso di tiramentu ku a tuma lugá dia 6 di novèmber último , pafó di e sentro di dibertishon Campo Alegre Resort, polis ta hasi un apelashon na komunidat pa yuda ku informashon ku por kontribuí na solushon di e kaso.

Riba e dia en kestion, un dama a yega den un outo blanku na e sentro aki i a baha for di e vehíkulo despues ku esaki a wòrdu stashoná riba e lugá di stashoná outo.

E sospechoso femenino a kana bai den direkshon di entrada di e sentro i algun meter promé ku e entrada prinsipal, a saka un arma di kandela ku e tabatin den su poder i lòs algun tiru dirigí riba un personal di seguridat.

Tiru for di e arma aki a alkansá e víktima, ku konsekuensia ku el a fayesé na e sitio. Despues di su akto, e sospechoso a kore bai bek den direkshon di e outo den kua el a yega na e sitio.

Kualke persona ku por rekonosé e dama riba e grabashon òf potrèt aki òf tin mas informashon di e kaso aki, sea asina bon di tuma kontakto ku polis na e numbernan 917 (24 ora pa dia) òf 108, si bo ta deseá di keda anónimo.

Kuerpo Polisial ta gradisí komunidat di antemano pa e koperashon.