Medida kontra botikanan ta pa spar 34 mion florin

Mañan tin reunion ku Suzy Romer:

1078
WILLEMSTAD—Den nos edishon di djabièrnè Vigilante a publiká ku hopi ta esnan u ta preokupá pa lokual ta trata e tarifa ku lo tin di paga pa keda drumi den kambernan di HNO.

Vigilante a risibí un splikashon ku apesar ku tin 60 mion florin èkstra na gastu ku lo a hasi estadia den e kambernan mas karu, esaki tòg lo no ser sinti pa e pashèntnan ni pa SVB tampoko kompanianan priva di seguro, debí ku minister Suzy Romer a perkurá pa hasi ahustenan den otro áreanan di salubridat ku tin di redunda den un diferensia di 84 mion ménos ku lokual ku nan tin di saka pa paga.

Manera ta konosí pa lokual ta trata e punto aki Vigilante a kombersá ku minister di finansa Kenneth Gijsbertha kende a rekonosé ku si lokual ku tin proyektá lo spar 84 mion esaki lo sirbi pa kubri e 60 mion di mas ku lo a bin komo rekargo pa keda drumi den e kambernan di HNO.

Ta resultá ku un dje sektornan den salu ku minister Suzy Romer tin pensa di korte pisa den dje ta esun di botikanan. Ta asina ku SVB a notifiká botikanan ku na momentu ku nan hasi nan deklarashonnan ku nan lo paga entre 30 pa 38% ménos. E medida aki di parti di SVB ta pa baha e gastunan ku nan tin di paga ku 34 mion, Ku e medida aki ta krea espasio pa kubri den e gastu èkstra di 60 mion ku lo mester a ser rekargá den e gastunan pa por a drumi den HNO.

E asosashon di botikanan ta realmente hopi hostiná relashoná ku e medida aki, ya ku esaki ta algu ku lo afektá nan tur ku tur e konsekuensianan ku e lo trese kuné. Vigilante a hiba kombersashon ku Shaheen Elhage kende ta presidente saliente di Asosashon di Botikanan i e la konfirmá na nos ku e medida aki lo afektá nan tur.

Tambe el a konfirmá ku mañan djamars nan tin un reunion programa ku Minister Suzy Romer. Aparte dje reunion aki ta asina ku ya nan a deliñá un abogado pa averiguá wak si loke ku kier hasi ku nan por ta posibel. E Asosashon di Botikanan ta konsiente ku tin un dekreto i ku tur loke SVB ta hasiendo ta ehekutando esaki, pero pa nan ta nifiká un atraso den nan entrada, paso asina 1 di yanüari 2020 drenta, nan ta pèrdè entre 30 pa 38% di kada remedi ku nan bende. Pa Shaheen Elhage esaki ta inaseptabel, paso ta nan komo botika ta esnan ku ta bai sinti e konsekuensia.