Jetair Caribbean finalmente por kuminsá realisá su buelonan

451
Despues ku a kaba di firma e sertifikashon pa hasi tur kos ofisial.
Willemstad- Despues di traha lunanan largu riba e dokumentonan nesesario den koperashon ku Curaçao Civil Aviation Authorities (CCAA), United Caribbean Airlines ku ta ópera bou di e nòmber di Jetair Caribbean finalmente a risibí su Air Operating Certificate (AOC) ayera dia 19 di novèmber 2019. Tantu gerensia komo e trahadónan a traha duru pa e logro aki.
Momentu ku tabata firma e dokumentonan pa tur kos bira ofisial.

Nan ta orguyoso di a logra e sertifikashon aki ku tambe lo tin un efekto positivo riba e ekonomia di Kòrsou. Jetair Caribbean ta un aerolinea komersial priva na Kòrsou ku ta ofresé buelonan regular òf charter for òf desde Karibe òf Sur Amerika. E vishon di e kompania ta pa bira un aerolinea regional importante den Karibe. E mishon di Jetair ta pa ofresé un produkto di transporte aéreo sigur i un servisio di nivel na e kliente. Jetair Caribbean ya por inisiá ku su buelonan charter for di e momentunan aki, miéntras ku e dokumentonan nesesario a keda manda na e destinashonnan huntu ku e AOC. Ku esaki ta warda riba aprobashon di e diferente rutanan pa asina por kuminsá realisá e buelo programa. Esaki no tabata posibel sin e AOC. Mientrastantu Jetair Caribbean ta preparando pa bende su pasashinan. Algun rutanan ku Jetair Caribbean lo bula ta Kingston, Port au Prince i Santo Domingo. Den un futuro serkano tambe lo inisiá buelonan pa Medellin i Baranquilla.