Van Bemmelen i Pietersz na kabes den kampionato habrí di Ahedres 2019

132
Akshon entre partisipantenan durante di e kompetensia.

WILLEMSTAD—Aktualmente ta tumando lugá riba nos isla, e kampionato habrí  di ahedres di Kòrsou. Esaki organisá pa Federashon di Ahedres, kual ta tumando lugá den “Zenoya Room” di “Acoya Resort, Villas and Spa”.

Ta trata di kompetensia ku tin 19 hungadó partisipando. Despues ku a inisiá dia 15 último, kosnan a kontinuá dia 16 i 17 i ta pendiente pa sigui dianan 23 i 24, ku ta durante di e fin di siman benidero, pa finalisá otro siman, na momentu ku lo tin wega riba e último 2 fechanan, kual ta djasabra dia 30 novèmber 2019 i tambe djadumingu, dia 1 desèmber 2019.

Federashon di Ahedres ta kontentu ku e patrosinio di Acoya Resort, na Vredenberg, unda ku e kompetensia ta tumando lugá.

E kampionato ta wòrdu hungá segun e sistema suiso, konsistiendo di 7 buèlta.

Pa loke ta e weganan ku ya a mira akshon, tabata den e di 3 buèlta na e di 55 movida, Fabio Mensing mester a entregá e wega kontra di Ursus van Bemmelen.

Michell Fayad mester a rindí kontra di e atakenan di David Pietersz i Rurik Capella a parti punto ku Alex Roose. Meskos Edwin Tjong-A-Hung tambe a parti punto ku Mariana Sanchez.

Despues di e di tres buèlta Ursus van Bemmelen i David Pietersz ta empatá ku 3 punto, ku ta produkto di 3 wega ganá, siguí pa Fabio Mensing, Rurik Capella, Alex Roose, Seydi Salim-Moussa i Stephen Pinedo, kada unu ku 2 punto.

Djasabra benidero, dia 23 novèmber 2019, pa 8’or anochi den e di kuater buèlta, e hóben prometedor David Pietersz lo enfrentá Ursus van Bemmelen i Fabio Mensing lo sali kontra Rurik Capella, kende ta e kuater hungadónan ku ta enkabesá e tabla di posishon, den e kompetensia aki.