Bon Bini supermarket  e supermerkado ku mas produkto na un preis ekonómiko

143
Punda–  Fundashon pa Konsumidó den estrecho koperashon ku departamentu di inspekshon di  Ministerio di desaroyo Ekonómiko (MEO) a selektá algun kategoria di produkto i a hasi un anotashon di preis na diferente supermerkado. Produktonan ku nan preis a keda anotá ta entre otro: produktonan pa hunta den pan, maishi i bonchi den bleki i bòter, sòpi den bleki i paki, makaroni, aros, hariña di funchi, hariña di pan, suku blanku, te, kòfi, lechi den paki i bleki, pasta di djente, toaya sanitaria, papel di wc, serbes, wiski etc. Na tur, a anotá preis di 177 produkto na 22 supermerkado. E anotashon di preis aki a tuma lugá entre 18 di òktober pa 24 di òktober.

Bon Bini supermarket, e supermerkado ku mas produkto na un preis ekonómiko! (for di e makutu di produkto ku a keda selektá)

Resultadonan di e komparashon di preis aki ta indiká ku Bon Bini supermarket ta e supermarket ku tin mas produkto na un preis mas ekonómiko. For di e 177 produktonan ku a keda pre selektá, e supermerkado aki tabatin un kantidat di 41 produkto na un preis mas kumbiniente. Mangusa Hypermarket ta keda na di dos lugá ku 30 produkto i Mangusa Rio na di 3 lugá ku un kantidat di 27 produkto na un mihó preis.

Mangusa Hypermarket ta mas mihó surti
A base di e resultadonan di e komparashon di preis aki tambe Fundashon pa Konsumidó por a tuma nota di e supermerkado ku tin mas produkto optenibel den rèki. Na momentu di e anotashon di preis, Mangusa Hypermarket tabata tin 154 produkto den stòk. Bon Bini Supermarket tatin 149 i Centrum Mahaai i Mangusa Rio tatin un total di 143 produkto.

Tuma Nota: Diferensia grandi den preisnan di Alkohòl
Nos por a tuma nota di un diferensia grandi di preis den e kategoria di Alkohòl. Por ehèmpel un bòter di Grey Goose Vodka di 750ml ta kosta fl. 56.76 na Esperamos supermarket. Na Vreugdenhil esaki ta kosta fl. 88.09, kual ta un diferensia di preis di fl. 31.33.

Nan por bisa tambe ku a nota un subida drástiko pa loke ta trata bebida alkohóliko. Por ehèmpel den luna di sèptèmber, un kaha di serbes Heineken di 25cl tabata kosta na Arti’s supermarket fl. 75.00. Den e periodo ku a hasi e anotashon di preis aki, e mesun kaha di serbes aki tabata kosta fl. 84.00. Pues, tuma bon nota di e subida nan di preis aki i wak semper unda ta kumbiní bo kumpra.  No lubidá di kontrolá fecha di vensementu riba etikèt di e produkto ku bo tei kumpra.  Pa kualke pregunta òf remarke tokante di e komparashon di preis por yama Fundashon pa Konsumidó via telefòn na 462-6666. Si bo ta interesá di risibí e lista di komparashon di preis, manda nos un e-mail na info@fundashonpakonsumido.org