7 di desèmber pa un anochi so lo habri porta nan di Naick’s Place

208
E tambe lo bai tei dia 7 di desèmber di Naicks Place

WILLEMSTAD,—-Djasabra 7 di dezèmber awor, e popular diskoteka den añanan 80, Naick’s Place awendia Club Sugar ta bolbe habri su portanan, pa un anochi. Despues di e tremendo ambiente ku tabatin na yüli último durante e promé ‘Back 2 Naicks Place’, ta masha hopi hende a keda ku gana di bolbe baila i gosa di un bon fiesta di añanan 80

Pues 7 di dezèmber tei bira otro anochi di hopi rekuerdo di e dushi époka di diskoteka den añanan 80.Riba e anochi aki e atenshon ta prinsipalmente riba e DJ nan original ku a toka den añanan 80. Lo bai tin presentashon di DJ manera Boogieman di The Pub, DJ John Anthony di Rosanna Disco i DJ Guido Tecla ku tabata e DJ di kas den e popular ‘Night clubs’, La Fontaine i La Hacienda.

Komo chèri riba e bolo, e biaha aki, HIGHWAY  BAND tambe tei i nan lo bini ku un repertorio kayente di hitnan bailabel di 80. Ya e karchinan pa ‘Naick’s Place goes Merengue, Disco & Hits’, ta bayendo manera pan kayente i práktikamente tur ‘early bird’ ta práktikamente  ‘Sold out’.

Mester bisa ku e ambiente ta kuminsá for di 9 te 3or di mardugá ku hit tras di hit, pa rebibá i gosa di e ambiente di añanan 80. Pues prepará pa bo baila, gosa i kòrda e dushi tempunan di Naick’s Place den Saliña, kaminda awor akí ta Club Sugar.