Dil Ulandes a kondusí na morto di Helmin Wiels ( part II)

3757
Huntu: Fiskal mr. Out i Rip ta baha trapinan di korte na yüni 2019, despues tratamentu di Maximus unda Jorge Jamaloodin a risibí 28 aña di kastigu.
PUNDA— Esaki ta e di dos artíkulo den un seri eksklusivo ku Vigilante ta bai publiká riba asesinato di Helmin Wiels i dikon Ministerio Públiko a tene pa hopi aña sekreto, kòmbersashonnan ku Wiels a hiba ku RST (lesa hustisia ulandes). Helmin Wiels a papia ku un hòmber ku yama Eric Kok. Pa komprondé kiko Wiels a papia ku Kok, mester bai bek 1 aña,  promé ku e fecha di 5 di mei 2013, e dia Wiels a fayesé. E enkuentro ku Wiels a hiba ku Eric Kok di RST,  no a keda sekretu, el a bin lèk.
Korekshon: na aprel 2014 Vigilante a publiká ku Wiels a papia.

For di filenan den korte i di Ministerio Públiko, por konkluí ku defuntu Florentina tabata “un brain” den set up di robo i asesinato. E fecha mas importante den morto di Helmin Wiels ta 28 di yanüari 2012. Riba e dia en kestion, defuntu Pretu Florentina den kompania di mas hòmber,  a biaha pa Aruba. Fo’i Hato nan a bula bai pa èrpòrt di Reina Beatrix. No pa drumi kant’i laman den solo, sino e hòmbernan tabatin un meta spesífiko: “robo di Rolex”.    Na Aruba el a studia tur kos adelantá i splika miembronan dje grupo ku nan ta bai kometé un atrako na Renaissance Mall den Playa. Esaki lo tuma lugá den Gandelman Jewelers. E grupo riba e dia en kestion a logra hòrta un kantidat di 42 oloshi. E plan tabata pa hòrta 54, pero 12 oloshi a keda atras.

E bolsa di e robo a generá 416 mil florin. Ministerio Públiko ta sospechá ku den e robo aki 3 hòmber mas a biaha ku defuntu Florentina. Ta trata di Jean Carlo Coffie,  Ryangelo Zimmerman i Offerman. Segun informashon di Ministerio Públiko, e hòmbernan a repartí e bolsa di 416 mil florin den nan 4. Fiskal Out, kende ta asistí Gert Rip den kaso Maximus a organisá dos seri di interogashon riba  Zimmerman i Coffie. E promé seri di interogashon a regarda e robonan di oloshi na Aruba riba yanüari 2012 i yüni 2012 na Kòrsou. E último robo aki tambe a tuma lugá na Renaissance Mall na Rif unda defuntu Florentina tabata envolví. Pero fiskal Out i Rip a kuminsá traha riba e robonan te na 2017, 5 aña despues ku morto di Wiels a kai. Ministerio Públiko a start un investigashon riba robonan di oloshi pa por trata na pone un relashon entre e morto di Wiels i Pretu Florentina, kende tabata organisá e robonan. Por ehèmpel a arestá Jean Carlos Coffie riba 7 novèmber 2017 i Zimmerman riba 23 di mei 2018.

Pa tal motibu e promé fecha dje robonan, 22 di yanüari 2012 ta e fecha mas importante durante investigashonnan dje asesinato di Helmin Wiels. Riba e fecha en kestion, Pretu Florentina kende a organisá e morto di Wiels a bula pa Aruba i kometé un atrako ku Coffie i Zimmerman. Tantu Jean Carlo Coffie komo Ryangelo Zimmerman a keda someté na interogashon riba un di dos seri di interogashon. Ta trata di “Maximus”. Ministerio Públiko no a logra saka nada konkreto for di nan deklarashon. Tampoko nan a logra deskubrí si ta Jorge Jamaloodin a paga e 416 mil florin pa 42 oloshi marka Rolex. Hasta a pone Zimmerman den un sel apart na Aruba i despues transporte pa Ulanda, den un programa di protekshon.

Fiskalnan Out i Rip a sambuya profundo pa por logra haña Zimmerman i Coffie den korte i trata na yega na un dil ku nan riba Maximus. Ámbos hòmber a desmentí di tabata den kompania di Pretu Florentina riba 22 di yanüari riba e buelo di Aruba. Pero un “vingerafdruk” di Coffie riba unu dje hèlmunan di bròmer a kologá e yu di Kòrsou. Miéntras pa Zimmerman, Out i Rip a buska pruebanan di DNA pa pon’é den banki serka nan. E dos fiskalnan, realmente no tabata interesá den e robonan di oloshi, sino kiko Zimmerman i Coffie tabata sa di Jorge Jamaloodin, Nini Fonseca i nan eks kordinadó, defuntu Luigi “Pretu” Florentina. E dos fiskalnan, tabata kier sa spesífikamente si na yüni 2012, despues di un robo di oloshi na Kòrsou, Jean Carlo Coffie huntu ku Pretu Florentina a kore bai bende e oloshinan serka Jorge Jamaloodin.

Na aprel 2014, momento a sali den Vigilante ku Helmin Wiels a papia ku RST, ni Ministerio Públiko no tabata por a komprondé kiko tabata pasando. Ni fiskal Gert Rip no a mira  e motibunan dje oloshinan sino te na 2017, momento el a kuminsá pèrsigui i arestá Coffie i despues Zimmerman. Fo’i Coffie e no logra saka nada, ni e 93 mil florin kual supuestamente Pretu lo a dividí entre nan 4. Zimmerman no tabata por a pone un relashon entre Jamaloodin i e bolsa di oloshi hòrtá na Aruba. Rip i Out a keda pegá. (lo kontinuá).

NOTA:  e dos hòmbernan Coffie i Zimmerman NO ta envolví den asesinato di Wiels. Ministerio Públiko a uza nan pa yega na informashon riba e robonan di oloshi.