E entertainment band 509 ta rumbo pa Hulanda 2020

201
Tur kos ta indiká ku nan ta na Hulanda 2020.

WILLEMSTAD,—-Di informashon ku a drenta na mesa di redakshon di ‘E Mulina’, ta bisa ku tin un promotor grandi di Hulanda ta den negoshashon ku gerente di e entertainment band 509 pa algun presentashon na Hulanda otro aña.

‘E Mulina’, tin informashon ku e negoshashon nan ta kanando riba un bon kaminda, loke ku ta e punto di diskushon na e momentu nan aki ta fecha nan ku 509 lo tin ku presentá na tera friu. No ta un sekreto ku e formashon musikal ta move hopi bon den nos farándula lokal, i ku tur wikènt nan tin presentashon.

Esaki mes ta e motibu ku e promotor di Hulanda su interes ta grandi pa e formashon musikal presentá na Hulanda 2020.Mas aleu nos tin informashon ku na e momentu nan aki 508 ta den studio di grabashon, esaki ta nifiká ku un ora pa otro nan lo bai manda algun piesa nobo na diferente radio emisora lokal.

Tambe nos tin i formashon ku e chèns ta hopi grandi ku 509 por hasi nan debut den Festival di Tumba 2020 su di 50 edishon. ‘E Mulina’, sigur lo bai sigui vigilá e moveshon i alabes e negoshashon di 509 su presentashon nan na Hulanda otro aña. Esaki sigur ta un tremendo informashon rondó di e entretainment band 509. Ta manera e dicho ku nos grandi nan semper ta usa “Trabou duru ta paga”.